The Definitive Guide to Living in the Capital , Cairo , Egypt

زي النهارده من 60 سنة بدأ أوركسترا القاهرة السيمفوني، واللي تعتبر أقدم أوركسترا في مصر، واللي كانت سبب في إننا نستغنى عن خدمات الأوركسترا الأجنبية في حفلاتنا الموسيقية، وبالمناسبة دي هتقدم “أوركسترا القاهرة السيمفوني” النهارده 28 أكتوبر 2019 حفلة موسيقية الساعة 8 في دار الأوبرا المصرية، وممكن تعرفوا تفاصيل أكتر عن الإيفينت وتحجزوا تذاكركم من هنا.

تعالوا بينا نتعرف على أبرز المحطات في تاريخ نشأة أوركسترا القاهرة السيمفوني، ورحلة وصولها للعالمية:

1) من سنة 1959 لحد النهارده قاد الأوركسترا أكتر من مايسترو مصري وأجنبي على مر تاريخها، وكان أولهم المايسترو النمساوي “فرانز ليتشوير”، وبعد كده المايسترو المصري “أحمد عبيد” وبعديه المايسترو “يوسف السيسي”.

2) في الأول فرقة أوركسترا القاهرة السيمفوني كانت بتقدم حفلاتها في دار الأوبرا المصرية القديمة وكانت عبارة عن حفلات سيمفونية بصحبة فرق الأوبرا والباليه المحلية والأجنبية ومن ضمنها فرقة “البولشوي” وفرقة “كيروف” وفرقة “الباليه الملكي في لندن”.

3) مع انتقال حفلات الأوركسترا لدار أوبرا القاهرة الجديدة، وتحت قيادة المايسترو “أحمد الصعيدي” سنة 1990، اتركزت نشاطات الأوركسترا في إطار الحفلات الموسيقية السيمفونية بس، وده فتح لها أبواب كتير كان من أهمها تقديم الأوركسترا لأعمال “برامز” و”بروكنر” و”مالر” و”رافيل” و”ديبوسي” و”سترافنسكي” و”بروكوفيف” و”شوستاكوفيتش” وغيرهم.

4) بعد دمج كورال “أكابيللا” مع أوركسترا القاهرة السيمفوني، شوفنا مجموعة من الأعمال الرئيسية المكتوبة للكورال والأوركسترا زي “المسيح” لهاندل و”القداس الجنائزي” لموتسارت ولفيردى والسيمفونية التاسعة و”القداس الجليل” لبيتهوفن والسيمفونية الثانية لمالر و”القداس الجنائزي الألماني” لبرامز.

5) شاركت فرقة الأوركسترا في كتير من المهرجانات الناجحة، واللي كان منها “مهرجان اتجاهات عربية” و”مهرجان بيتهوفن” و”مهرجان موسيقي القرن العشرين” وكمان نظمت ورش عمل دولية في كيفية قيادة الأوركسترا، وقامت بجولات فنية حوالين العالم، كانت سبب في شهرة الأوركسترا عالميًا، وساهمت في توليها بعد كده مجموعة من القادة العالميين.