في الويك إند.. دليلك للسفر في رحلة بصرية مبهرة مع توت عنخ آمون
الجيزة المتحف المصري الكبير المعرض التفاعلي بالمتحف المصري سياحة في مصر متاحف مصر مصر معرض توت عنخ آمون
Cairo 360
المتحف المصري الكبير بيستعد لاستقبال جمهوره الضخم من كل الدنيا، وقريب هيكون له حفل افتتاح مبهر هيتكلم عنه العالم كله، لكن حاليًا أنت مش محتاج تستنى الافتتاح الرسمي علشان تستمتع بزيارته، تقدر تحضر الفترة دي المعرض التفاعلي لقصة الملك الشاب توت عنخ آمون في عرض بصري مبهر داخل المتحف المصري الكبير.
تعالوا نعرف تفاصيل أكثر عن المعرض التفاعلي لتوت عنخ آمون بالمتحف المصري الكبير بالجيزة.
View this post on Instagram
بمجرد دخولك من بوابة المتحف المصري الكبير، هتلاقي نفسك سافرت بآلة زمن لأكثر من 3500 سنة فاتت، وهتعيش قصة الملك توت عنخ آمون في عرض تفاعلي بصري هيحيط بك من جميع الجهات بزاوية 360 درجة، في عرض مدته 30 دقيقة، واللي من خلاله هتعيش حياة مصر القديمة وسط المعابد والكنوز والأسرار المعاد إحياؤها في هذه التجربة دي باستخدام “الذكاء الاصطناعي”.
في التجربة دي بيمر النهر بجوار الحاضرين، كمان بتمر من تحت أرجلهم حشرة الخنفساء أو “الجعران” المصري القديم وسحالي الصحراء وسط مقابر القدماء.
وبيظهر الملك الشاب في العرض التفاعلي وهو بيتكلم للحضور بملابسه زاهية الألوان والفخامة المصرية القديمة المعروفة، مرة هتلاقيه قدامك ومرة تانية هتلاقيه وراك، في عرض تفاعلي شيق بتصحبه موسيقى تصويرية رائعة.
كمان بيتضمن العرض رحلة الكشف عن مقبرة الملك الشاب، المقبرة الأشهر في العالم بكنوزها الساحرة، مع صور نادرة من موقع الاكتشاف والمكتشف البريطاني هوارد كارتر.
والمعرض التفاعلي للملك الذهبي هو جزء من سلسلة المعارض المؤقتة للمتحف المصري الكبير، والعرض التفاعلي نتيجة شراكة بين المتحف ومؤسسة مدريد آرتيس ديجيتاليس الإسبانية.
