The Definitive Guide to Living in the Capital , Cairo , Egypt

مش مبالغة مننا لو قولنا أن فن البانتومايم أو التمثيل الصامت يعتبر من أقل أنواع الفنون من ناحية الجماهيرية، لكن خلي بالكم أن الموضوع مختلف عن فن البانتومايم Pantomime الشهير في بريطانيا، وهو نوع من الفنون المدفونة اللي ناس قليلة جدًا بـ تفهم طبيعتها، شوفنا الفترة الأخيرة في مصر مؤشرات لوجود النوع ده من الفن، وبدأ الفنانين الصامتين يتجولوا في شوارع القاهرة والمواصلات العامة ويقدموا عروضهم، في محاولة لتقديم فنهم فى الشارع.

فن التمثيل الصامت بـ ترجع جذوره لقدماء اليونان، ويُقال أنه مشتق من نوع من أنواع الفنون عند القدماء المصريين، أكيد كلنا عارفين شارلي شابلين اللي يعتبر أشهر فنان صامت في التاريخ، واللي صور أفلام ومسرحيات في زمن السينما الصامتة، وصحيح فيه فنانين مشهورين زي باستر كيتون ومارسيل مارسو، لكن صعب جدًا حد في الزمن الحالي يوصل لشهرتهم.

طبعًا مش معنى كلامنا أن مافيش أمل خالص!

خبير التمثيل الصامت المصري أحمد نبيل بـ يشوف أن أحلى حاجة في النوع ده من الفن أنه بـ يتكلم لغة عالمية مفهومة لأي شخص على كوكب الأرض مهما كانت ثقافته.

وشرح أحمد نبيل وجهة نظره أكثر وقال: "الناس ممكن تنسى الكلام، لكن مستحيل ينسوا الأفعال والحركات، أنت ممكن تفتكر شخص من حركاته وتعبيراته، وده أكبر دليل أن فن التمثيل الصامت هو أكثر فن صادق".

درس أحمد فن البانتومايم في روسيا وتعلم في "مدرسة مارسو للبانتومايم"، وهي واحدة من أهم مؤسسات تعليم فن التقليد والإشارة اللي تأسست على يد مارسيل مارسو.

سافر أحمد بعروضه لأماكن كثيرة ومنها: ألمانيا والهند وإيطاليا وأستراليا، وكمان عمل عدد من العروض الضخمة في دار الأوبرا المصرية وحصل على جوائز كثيرة.

وطبعًا فن التمثيل الصامت أو البانتومايم زيه زي أي نوع من أنواع الفن محتاج لحملات توعية ثقافية واجتماعية، وعلشان كده الفنانين المحترفين بـ يدرسوا قواعد اليوجا وعلم النفس وعلم الاجتماع والفلسفة لتوسيع قاعدة معرفتهم وأدائهم.

وقال نبيل: "لازم فنان البانتومايم يكون صاحب ثقافة ورؤية ويعرف إيه اللي بـ يحصل في العالم، لازم يعرف نوعية جمهوره قبل تقديمه للعرض، يعني مثلاً ممكن يقدم عرض عن واحد بـ يموت من الجوع وينجح جدًا لما يوجهه لجمهور من مجتمع فقير، لكن لو قدمه لناس أغنياء الموضوع هـ يكون بعيد عن اهتمامهم".

وصحيح شعبية الفن ده تراجعت كثير عن زمان، لكنه لسه متواجد في مصر؛ يعني على سبيل المثال ساقية الصاوي بـ تستضيف مهرجان تمثيل صامت كل سنة، وزي ما قال واحد من الممثلين الصامتين وهو عمرو عبد العزيز أن النوع ده من الفن غريب شوية على المصريين، وقال عمرو: "مرة واحد افتكرني ست علشان دهنت وشي باللون الأبيض، وواحد ثاني افتكرني شحات".

المعهد البريطاني سنة 2013 موّل مشروع فن تمثيلي صامت ضمن مشروع "المفكراتي"، في محاولة منهم لترويج فكرة مسرح الشارع في مصر، وقدم عمرو عروض في شارع تحت الربع في منطقة الدرب الأحمر، وفي مصر القديمة، والأماكن دي كان الهدف منها تعريف الأحياء الفقيرة بالنوع ده من الفن.

وأضاف عمرو: "بدأ الناس مع الوقت يضحكوا على تمثيلي ويتفاعلوا معايا، كل اللي محتاجينه هو شوية وقت علشان يستوعبوا النوع ده من الفن وأننا بـ نقدم لهم عرض فني هدفه يمتعهم ويبسطهم".

وبـ يشوف محمد عبد الله -وهو فنان تمثيل صامت من تلامذة أحمد نبيل- أن فن البانتومايم شوية بشوية بـ يكسب شعبية في القاهرة وده لأن العروض بـ تلمس حياة المواطن اليومية وكمان بـ تعبر عن مشاعرنا بطريقة ممتعة ولها مغزى.

وأضاف محمد: "البانتومايم من الفنون اللي بـ تسمح بالتواصل مع الناس بدون كلام، وبكده تكون قدرت تكسر حاجز اللغة".

صحيح كل يوم بـ يعدي بـ نشوف ظهور أكبر لفن البانتومايم، لكن الفنانين اللي تكلمنا معاهم فاهمين الموقف الحالي كويس وشايفين أن المبادرات الفنية والثقافية في مصر عليها دور كبير في تقديم فنهم، طبعًا مش معنى الكلام ده أن الفنانين مش محتاجين يبذلوا مجهود.

خلص محمد كلامه وقال: "فنان التمثيل الصامت زي أي فنان ثاني، محتاج يتعلم ويركز في البروفات وطبعًا محتاج طوال الوقت يلاقي تشجيع وتحفيز علشان يتطور كفنان".