The Definitive Guide to Living in the Capital , Cairo , Egypt

المعادى:

لو حضرتك مش من المعادى يبقى لازم الأول تعرف الطريق كويس علشان هـ تنزل من محطة مترو المعادى وتمشى لحد ميدان الحرية.. وبعدين تتحرك ناحية الكورنيش لحد ما تلاقى “بيت الدونتس” وأمامه بالضبط هـ تلاقى “Flavors” مكان نكهته مختلفة.. وساعتها هـ نقول لك حمد الله على السلامة أنت وصلت إلى الستوديو المنشود.. “عائشة رضوان”.

عن عائشة:

مين عائشة رضوان؟ وليه اتسمى بالاسم ده؟.. هى فنانة تشكيلية اشتغلت فى إدارة أماكن زى جاليريهات وحاجات لها علاقة بالأطفال وأخذت خبرة في مجال الكورسات وقررت تعمل حاجة خاصة بها ألا وهى “ستوديو عائشة رضوان”.

غية الحمام:

هنا مكان مختلف.. تحس أنه مكان مفتوح مع أنه مغطى بسقف خشبى معمول بحرفية شديدة.. تشبه تقسيمات “غية الحمام” بالضبط.. لكن الاختلاف هنا فى انبساط اللون الأبيض على كل المكان لدرجة الإحساس بحالة من النشوة والهدوء النفسى مع “الموسيقى الهادية” اللى منتشرة فى كل مكان.. أما لو تكلمنا عن الديكور فلازم تأخذ بالك من حاجة مهمة جدًا.. المهندس اللى عمل المكان بسيط جدًا.. كراسى خوص أبيض متضفرة وترابيزات بيضاء.. وشاشات فى كل مكان وفى النهاية هـ تستمتع بالمكان والمشروبات اللى هى غالية شوية بس تقدر تتعامل يعنى.

عن الستوديو:

فى وسط كل ده هـ تلاقى ستوديو عائشة واخد مكان لوحده هو مكان مقفول حوالى (50  متر) لكن معمول بحرفية شديدة، فيه حائط أسود بـ يتعاملوا عليه كأنه “سبورة” والكراسى والحوائط والمرايات ووحدات الإضاءة كلها صناعة يدوية من عمل الفنانة “عائشة رضوان” والفريق اللى معاها.. وكل ده علشان الكورسات اللى بـ تتعمل لكل الأعمار.. والستوديو مقر لمؤسسة ماريونت لفنون الدمى ومسرح العرائس.

هـ تلاقى هناك مجموعة كورسات: “تنمية إنسانية.. إدارة حياة.. إدارة مشروعات.. إدارة أعمال.. إعداد وإذاعة.. رقص الزومبا.. رقص شرقى.. بالية للكبار والصغار.. كورسات فنية زي الرسم بالزيت، وألوان المياه، والباستيل، والفحم، وتعليم الرسم، وتعليم الكاريكاتير، وتعليم الرسم الكارتونى، وتعليم الرسم الصينى، وتعليم الفن الفرعونى، وعمل ورش للأطفال زى الأوريجامى وغيرها، تعليم صناعة الماريونت وعرائس خيال الظل وعرائس العصا وعرائس القفاز.. وورش تمثيل للأطفال والكبار.. ورش تصميم وتنفيذ ديكورات داخلية وخارجية ومسرحية.. وتصوير فوتوغرافى.. نحت.. خزف.. كورس المنتجات الخشبية.. كورس المنتجات الجلدية.. ورشة أزياء تصميم وتصنيع.. ورش تصنيع حلى بالفضة والنحاس.. كورس تعليم بيانو وكمان.. ورش يوجا وتأمل.. ورشة صناعة الأفلام.. تنسيق أفراح.. وتعليم لغات “إنجليزى وفرنساوى”.

والجديد بقى فى المكان والمميز فيه.. أن حضرتك ممكن تطلب عمل كورس معين وهما هـ يعملوه لك.. وده ماشى مع شعارهم “مهما يكون سنك أكبر وأصغر دائمًا تقدر تخرج الموهبة اللى جواك”.