The Definitive Guide to Living in the Capital , Cairo , Egypt

مصدر الصور

لو بتتابع حاليًا مسلسل “راجعين يا هوى” اللي بيقوم ببطولته الفنان خالد النبوي، واللي بيُعرض في موسم رمضان 2022، أكيد حبيت البيت الأثري الجميل اللي ظهر في المسلسل باعتباره بيت “عم جابر”، اللي بيقوم بدوره الفنان أحمد بدير، لكن الحقيقة البيت ده، واللي ظهر منه في المسلسل الجزء الخارجي منه، هو بيت السحيمي التاريخي الموجود بالقرب من شارع المعز، وبالتحديد في حارة الدرب الأصفر.

في الموضوع ده هنعرفكم أكتر على حكاية البيت التاريخي ده، وهنعرفكم كمان على تفاصيل زيارته.

بيت السحيمي أو بيت الشيخ عبد الوهاب الطبلاوي هو بيت عربي بمعمار شرقي متميز، عبارة عن بيتين مفتوحين على بعض اتبنوا في القرن الـ 17 والـ 18.

زمان، وبفضل موقع القاهرة الممتاز على الطريق التجاري القديم، كتير من سكان البلد كانوا عايشين في بيوت راقية بتصميمات جميلة، وبيت السحيمي يعتبر مثال لأحسن البيوت اللي باقية من بيوت التجار دول.

البيت كان فيه تلفيات كتير، حيطانه إتشققت ومشربياته إتفككت، لسنين طويلة فضل بيت السحيمي في حالته المتدهورة، مش بيستخدم ومش متقدر. لكن في سنة 1990، إتعمل مشروع دقيق علشان يرجعوا المبنى التاريخي لحالته الأصلية وثبت إنه مش بس مفيد للبيت، لكن للحي كله كمان.

ومن وقت التجديدات الكبيرة اللي حصلت في البيت، المبنى دلوقتي مفتوح للعامة كمتحف ولعروض متنوعة. في رمضان البيت بيستخدم لعروض وحفلات ومسرحيات بتنظمها وزارة الثقافة.

التذاكر سعرها رخيص سواء للمصريين أو الأجانب، والتجول فى البيت أى يوم من 9 ص لـ  5م.

أول أوضة فالبيت هي مدخل فخم بأسقف عالية مبهرة ونجفة طويلة. بالرغم من الحيطان الحجرية البسيطة، الأوضة فخمة وفيها مشربيات خشبية دقيقة بتدخل ضوء خفيف لكن بتدي خصوصية جامدة. المشربيات المزخرفة ظاهرة موجودة في البيت كله، و بتضيف تناغم مع الهيكل الحجري.

الدور الأول في المبنى فيه مجموعة غرف فخمة، أي زائر بيخاف من الضلمة أوالأماكن المقفولة ممكن مايحبش يستكشف البيت أكتر من كده. الدور التاني عامل شوية زي المتاهة، طرق ضلمة وضيقة غالبًا بتودي على أوض ضلمة أكتر، وأسقفها واطية. شوية من الغرف فاضيين خالص مافيهمش حاجة غير طبقة تراب لازقة على الحيطان، وشوية غرف تانية فيها سجاد وشوية ترابيزات وتحف. أوضة واحدة في الدور التاني مفيهاش مشربية بس فيها بلكونة جميلة بتطل على الركن اللى تحت. الأوضة دي فيها قعدة تنفع علشان تجمع نفسك وأنت بتستكشف البيت.

بعد استكشاف متاهة البيت، المحطة الأخيرة لازم تبقى ورا بيت السحيمي، اللي فيها ركن تاني بيعرض صور بتوضح البيت قبل وخلال وبعد التجديدات الكبيرة اللى اتعملت في السنوات الأخيرة.

عنوان البيت: حارة الدرب الأصفر، من شارع المعز لدين الله الفاطمي.

تليفون: 0227878865.