The Definitive Guide to Living in the Capital , Cairo , Egypt

لو سمعت عن “طبلة الست”، يبقى أكيد عارف إنهم مش مجرد فرقة موسيقية، دول حالة مختلفة بتجمع بين الفن والتراث وطاقات النساء اللي بتحب تعبر عن نفسها بشكل حقيقي.

الحكاية بدأت سنة 2019 لما “سها محمد علي”، صاحبة الروح الحلوة وعشق للمزيكا، قررت تجمع مجموعة سيدات بيحبوا الطبل والغناء. ومن هنا اتولدت فرقة طبلة الست، اللي بقت مهمتها إنها تنشر السعادة وتحيي التراث المصري اللي جاي من كل مكان في مصر، سواء الصعيد، الريف، السواحل، أو حتى الواحات والنوبة.

رسالة الفرقة هي أنهم يخلقوا مساحة لكل ست إنها تشارك موهبتها وتوصل صوتها. والأجمل كمان إن أغانيهم بتركز على المرأة، فرحها، شجنها، وكل الحكايات اللي ممكن تكون اتنست أو تجاهلتها المزيكا التقليدية.

الفرقة بتتكون من عشرة أفراد، وكل واحدة فيهم جاية من خلفية مختلفة، بين المهندسات، والممثلين، وطالبات الكليات المختلفة، لكن اللي جمعهم هو حبهم للمزيكا والفن. الفريق كمان بيضم عازفين زي “رأفت فرحات” على الكولة و”سيد الحسيني” على المزمار، اللي بيضيفوا روح مختلفة للأغاني.

لو حضرت حفلة ليهم، هتسمع حاجات من التراث زي: “يا صلاة الزين”، “مربعات ابن عروس”، و”يا بهية”. مش بس كده، دول بيعملوا ميدلي صعيدي وجمل غنائية تحسسك بروح الريف المصري اللي كله طيبة وحلاوة.

طبلة الست قدمت عروض في أماكن كتير زي معهد جوتة، المركز الثقافي الإسباني، ودار الأوبرا. وكان ليهم دور مميز في مهرجانات زي مهرجان الطبول بالقلعة، ومهرجان إيزيس الدولي لمسرح المرأة.

بيميز الفرقة إنها مش بس بتقدم أغاني أو عزف، هما بيعيدوا الروح للأغاني التراثية، وبيكسروا الحواجز بين موسيقى المدينة والريف. وجودهم رسالة إن الست المصرية عندها صوت، وموهبة، وحكاية تستحق إنها تتسمع.

لو لسه ما شفتهمش، يبقى مستني إيه؟ حفلاتهم دايمًا مليانة طاقة، فرحة، وصوت بيرجعك لأصولك المصرية.