The Definitive Guide to Living in the Capital , Cairo , Egypt

رمضان طول عمره هو شهر الإبداع الفني في مصر، وبيظهر فيه شخصيات أصبحت مهمة في حياة جيل الثمانينيات والتسعينيات، وكل شخصية كان لها تأثير إيجابي عند الجيل ده، ولكن للأسف الشخصيات دي اختفت وكتير من الأجيال الجديدة مش عارفاها، ومش فاضل غير ذكريات منها بتتحكي وسط الكلام، زي بوجي وطمطم و نيلي وشريهان وعمو فؤاد وغيرهم كتير، علشان كده خلال السطور الجاية هنقول لكم على شخصيات رمضانية أثرت بجد في ملايين المصريين.. زمان.

نيللي

سنة 1975 ظهرت فوازير نيللي، اللي نقدر نقول عليها بجد ملكة الفوازير واللي معروفها بروحها الجميلة وخفة دمها، واستمرت في تقديمها لسنوات، وكانت كل فزورة لها تيمة معينة.

شريهان

في 1987 بدأت الفنانة شريهان في تقديم فوازير رمضان بشكل مختلف، وكل سنة كانت بتبهرنا أكتر من اللي قبلها، لحد سنة 1993 كان الموسم الأخير لها في فوازير رمضان.

فطوطة

بنبرة صوت طفولية ظهرت الشخصية الخيالية الكوميدية فطوطة عام 1982، واللي كان بيأديها الفنان سمير غانم، نجم الكوميديا في الوقت ده، واستمر عرضها لأكتر من موسم وكانت محققة نجاح كبير جدًا.

عم شكشك

واحدة من شخصيات مسلسل بوجي وطمطم، وكان دايمًا هو صاحب النصيحة والحكمة بحكم سنه الكبير، وكان بيأدي دوره صوتيًا الفنان رأفت فهيم، وبعد وفاته أدى الدور الفنان رضا الجمال، اللي أدى كمان صوت والده صاحب المقولة الشهيرة “هات العصايا يا ولد”.

بوجي وطمطم

ماكنش فيه بيت في مصر وقت الفطار مش مشغل بوجي وطمطم، وكان الكبار قبل الصغار بيتفرجوا عليه، وهو مسلسل عرائس من أعظم ما أنتجت مصر في الثمانينيات، وكان بيأدي دور بوجي الفنان يونس شلبي، ودور طمطم الفنانة هالة فاخر، وما زال إلى الآن رمضان مرتبط عند الكبار بأيام بوجي وطمطم.

بكار ورشيدة

أبو كف رقيق وصغير، كرتون بكار بمغامراته وحكمته وعقله اللي كانوا سابقين سنه نجح في أنه ياخد مكانة وسط المصريين، وهو مسلسل كرتون تم تصويره في منطقة النوبة بأسوان، وكان لا يقل عن بوجي وطمطم أهمية رغم أنه حديث وأول حلقة منه كانت سنة 1998، ولكن مع وفاة الدكتور منى أبو النصر مخرجة العمل اختفى رغم بعض المحاولات -غير المؤثرة- لإعادته.