زُور “رمضان” في شارع المُعز
Mostafa Maher
رمضان السنة دي غير السنين اللي فاتت، و يمكن عند معظمنا شعور بافتقاد روح الشهر
ده اللي بـ تتميز به مصر وخصوصًا القاهرة، وعلشان كده لازم نتعب شوية وننزل بنفسنا
ندوَّر على رمضان ونستمتع به.
القاهرة القديمة لسه فيها أماكن محافظة على رمضان رغم الأحداث السياسية،
وأماكن كثيرة قدرت تصنع من “الفوضىَ” شىء مُمتع! ودي أغرب حاجة هـ تقابلها
في شوارع القاهرة الفاطمية، وتحديدًا في شارع “المُعز لدين الله”.
وأنت رايح لشارع المعز حاول ما تستخدمش عربيتك لأنك هـ تتعب بسبب زحمة
المنطقة هناك خصوصًاً من ناحية العتبة وميدان باب الشعرية، واحتمال كبير ما تلاقيش
مكان مناسب تركن فيه عربيتك، ولو لقيت ما حدش يقدر يضمن لك أنك ترجع تلاقي عربيتك
زَيّ ما هى!
أفضل مكان لدخول الشارع هو من ناحية باب الفتح، وممكن قبل ما تدخل تزور
مطعم «زيزو» وتجرب ساندويتشاته اللي أكيد هـ تعجبك.
وأنت داخل على شارع المعز حاول تمسك نفسك من الصدمة، لأنك لو كنت متعود
تزور الشارع قبل الثورة، فلازم تعرف أن الشارع ملامحه تغيرت بعد انتشار الفوضى،
وأفضل حل أنك تعتبر نفسك أول مرة تزور المكان.
في دَخلة الشارع على شمالك ناحية مسجد الحاكم بأمر الله، هـ تلاقي صف كراسي
لقهاوي جديدة، أفضلهم من حيث الخدمة والمكان هى قهوة أو كافيه «جروبي» أمام باب
المسجد مباشرة. الجو لطيف وفيه شاشة تليفزيون كبيرة، والكراسي جيدة (شبه كراسي
قهاوي البورصة في وسط البلد)، والأسعار معقولة يعني الشاي مثلاً بـ 2 جنيه، والعصائر
سعرها يتراوح من 3 لـ 6 جنيه، والمكان مناسب للبنات والأولاد، والجو هناك رائع ومنفصل
عن جو القاهرة.
لو كَملت مَشيّ في الشارع من غير ما تدخل في شوارع جانبية هـ تلاقي عند «بيت
السحيمي» قهوة لطيفة مش مختلفة عن اللي قبلها كثير، وفي نفس المكان لو دخلت في شارع
الدرب الأصفر وكملت كأنك رايح على باب السحيمي هـ تلاقي كافيه (in-door) اسمه «ليالي السحيمي»، مختلف شوية عن باقي قهاوي وكافيهات المكان
لأنه بـ يقدم تخت شرقي وغناء في بعض الأوقات.
ممكن بعد كده تكمل استمتاع بالمكان وتأخذ صور رائعة، خاصة قبل السحور
مباشرة، يعني على الساعة واحدة، علشان تكون العربيات قل عددها في الشارع، والمحلات
اللي عاملة زحمة تكون قفلت.
كمان قبل ما تقرر تتسحر، ممكن تأخذ فكرة عن المعروضات الجديدة في خان
الخليلي، لأن المحلات هناك بـ تهتم جدًا برمضان وبـ يكون لهم أعمال يدوية خاصة
بالشهر ده تحديدًا، لو كنت حابب تقضي وقتك لآخره وتتسحر في الحسين، حاول ما تتأخرش
عن الساعة 3 الفجر علشان تلحق تلاقي مكان مناسب تقدر تتسحر فيه براحتك، وما تقلقش
السحور في المكان ده مش مكلف لأن الفرد ممكن ما يدفعش أكثر من 15 أو 20 جنيه فقط
في سحور متكامل. وعامة شبراوي الحسين هو الأفضل للسحور من حيث جودة الطعام والأسعار.
بعد السحور ممكن تكمل جولتك في المكان وتدخل مسجد الحسين والأزهر، وممكن
كمان ترجع للمعز، وتدخل المساجد هناك وتستمتع بروعة الآثار الإسلامية اللي عمرها
يزيد عن 600 سنة.
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
