The Definitive Guide to Living in the Capital , Cairo , Egypt

بالصدفة وإحنا ماشيين في شارع العشرين شوفنا مكان جميل اسمه رواية، قررنا ندخل نكتشفه، لقينا عالم جميل هيعجب كل عشاق الكتب.. التفاصيل؟ في السطور الجاية.

شارع العشرين في فيصل واحد من الشوارع الشعبية الزحمة جدًا في القاهرة، الشارع مليان محلات أكل وملابس، علشان كده لفت نظرنا حاجة مختلفة خالص.. بتتحدى الطابع الإستهلاكي اللي بيميز الشارع.. مكتبة ومركز ثقافي في شارع العشرين؟ الحقيقة دي مغامرة من أصحاب رواية.

أول ما دخلنا المكان لاقينا أفكار حلوة، تقدر تستعير أي كتاب يعجبك بمبلغ رمزي، كمان فيه بعض الأنشطة الحلوة اللي بتحصل في المكان. منها ورش رسم وتمثيل وحاجات تانية، يعني عندهم أفكار حلوة وهدفهم يكونوا أكتر من مجرد مكتبة بتقدم كتب.

وفيه قعدة عربي حلوة، يعني تقدروا تعتبروا المكان أقرب لمساحة عمل مشتركة تقدروا من هناك تشتغلوا أو تذاكروا أو حتى تستمتعوا بقراءة مجموعة من أحدث وأجمل الكتب.

الفريق اللي شغال في المكتبة هايل! بيستقبلوكم بابتسامة جميلة، عرفنا منهم إن عندهم فرع تاني في شارع فيصل الرئيسي، وبعدها بكام شهر فكروا يعملوا فرع تاني في شارع العشرين، وهدفهم إن الثقافة توصل للناس في كل مكان حتى في الأماكن الشعبية.

اتفرجنا على المكان وحسينا براحة نفسية شديدة، حاجة تخليك تحس إن البلد لسه فيها أمل ما دام فيها ناس لسه بتغامر بتقديم العلم والثقافة وبتوصلها للناس خصوصًا في الأماكن المحرومة من وجود مكتبات.

المكان فيه أحدث الإصدارات، وبعد لفة سريعة على رفوف “رواية” نقدر نقول إننا لقينا هناك كل عناوين الكتب والروايات الشبابية المهمة.

علشان تعرفوا تفاصيل عن “رواية” ممكن تدخلوا على صفحتهم من هنا.

وعنوانهم: 72 ش العشرين – محطة أسواق العبد – متفرع من ش فيصل

تليفون: 01061636760