رحلة أبلة فاهيتا من يوتيوب إلى “نتفليكس”
أبلة فاهيتا مسلسل أبلة فاهيتا مسلسلات نتفليكس نتفليكس
Omar Abd-elmaqsoud
برغم إن عمر برنامجها مش كبير، إلا أنها دخلت قلوبنا بكل سهولة من ساعة ما كانت بتقدم حلقات قصيرة على اليوتيوب في 2011، النهارده بعد رحلة طويلة من النجاح والشهرة، هتاخد أبلة “فاهيتا” أول خطواتها في اتجاه العالمية، وأخيرًا وبشكل مؤكد ونهائي هنشوف أبلة “فاهيتا” على “نتفليكس – NETFLIX” في 2020.
من فترة كان في كلام كتير عن إن أبلة “فاهيتا” هترجع للأضواء بعد غياب سنتين وكانت شركة JWT المالكة لحقوق الشخصية لمحت عن اتفاق مع شبكة “نتفليكس” لتقديم عمل حصري، لكن لحد وقت قرب ما كانش في تفاصيل كتير عن الموضوع، وناس كتير كانت فاكره إن الموضوع إشاعة.
لكن يوم الاثنين 23 ديسمبر أعلنت أبلة فاهيتا على صفحتها الرسمية على الفيسبوك مع هشتاج #الأرملة_ تستطيع إنها “خبطت في القمة” بتعاقدها مع “نتفليكس”.
أما نتفليكس من ناحيتهم فرحبوا بالأبلة على صفحتهم الرسمية وقالوا لها “نورتينا يا أبلة، ويلكم باك”.
تعاون أبلة فاهيتا مع نتفليكس هيكون عبارة عن مسلسل بيستعرض الجانب الإنساني للأبلة في إطار اجتماعي كوميدي استعراضي مع شوية إثارة وغموض، وهيعتبر ده العمل الدرامي الأول لأبلة فاهيتا وثاني مسلسل مصري من إنتاج “نتفليكس” الأصلي.
منتظرينك يا أبلة!
