The Definitive Guide to Living in the Capital , Cairo , Egypt

“يعني بتلعب في فرقة حسب الله؟!” سؤال يمكن كتير مننا كان بيقوله على إنه إفيه وهزار، أو حتى كان بيتكلم بجد على اعتبار إن فرقة “حسب الله” واحدة من الفرق الموسيقية الفولكلورية المصرية الأصيلة، اللي مجاش زيها لحد النهارده، وده لإنها كانت بتعزف للناس في الشوارع والحارات المصرية في وقت كان ده شئ غريب، لكنه مبتكر.

النهارده في أيامنا دي، إننا نلاقي فرقة أو “باند” بتعزف موسيقى في الشارع بقى صعب لاعتبارات كتيرة، وتحديات أكتر، لكن اللي حصل إن مجموعة من الشباب قرروا يكسروا الحاجز ده ويستلهموا روح فرقة “حسب الله” لكن بستايل اليومين دول، وسموا نفسهم “حسب الله باند” أو “BEEB Marching Band” لموسيقى الشارع.

الفرقة بدأت طريقها الفني من سنين قليلة، وبتضم 11 شاب بيعزفوا آلات نحاسية وآلات نفخ وإيقاع، زي فرقة “حسب الله” بالضبط ولاقت نجاح كبير لأكتر من سبب، منها إعادة إحياء موسيقى الشارع، واستلهمهم لروح واسم فرقة “حسب الله” الفلكلورية المصرية للموسيقى الشعبية، اللي اتأسست في نهايات القرن الـ 19 وكانت ناجحة نجاح ساحق، على المستويين المحلي والعربي.

السبب التاني في نجاح “حسب الله باند” ، كان علشان مواكبتهم للعصر الحالي واختلف نوع الموسيقى المطلوبة والمسموعة، فبدل الموسيقى الشعبية وأغاني التراث اللي كانت بتعزفها فرقة “حسب الله” التقليدية، الفرقة الجديدة بتقدم أغاني “جاز” لاتينية اللي ليها جمهور واسع في مصر.

ممكن تتعرفوا على الباند أكتر من خلال صفحتهم على الفيسبوك من هنا.