حوار مع الكاتب أحمد مراد: القاهرة حبيبتي اللي مجنناني
waleed Abou El Seoud
أحمد مراد روائي وسيناريست شاب حقق نجاح كبير بداية من روايته فيرتيجو اللي نجحت جدًا واتحولت لمسلسل من بطولة هند صبري، وبعدها رواية تراب الماس اللي حققت مبيعات كبيرة، ثم الفيل الأزرق اللي اتحولت لفيلم حقق نجاح وإيردات.
قررنا في كايرو 360 نقابل أحمد ونتكلم معاه عن القاهرة، وعن أكله المفضل، وحكى لنا عن الزمالك والسيدة زينب.
القاهرة بالنسبة لك إيه؟
القاهرة هي حبيبتي اللي مجنناني، ولما أتعب منها بحب أهرب وأسافر، لكن بعد أربعة أو خمسة أيام بلاقي نفسي عاوز أرجع لها تاني. رغم الحر والعوادم والزحمة والدوشة اللي فيها.
في القاهرة ذكرياتي وعائلتي، بحب مناطقها خصوصًا السيدة زينب، وهناك بلاقي نفسي لما باكل فول عند أم هاشم، بحب كمان الزمالك، وبستمتع بأكل البيتزا في توماس، وبصفة عامة بعتبر الزمالك هي وسط البلد الجديدة.
كلمنا عن الأصليين
في فيلمي الجديد الأصليين شخصية بهية لا تعني مصر زي ما يوسف شاهين عودنا، وزي ما غنى لها أحمد فؤاد نجم والشيخ إمام، بهية في الفيلم هي تاريخنا المشوه اللي وصلنا للمرحلة الغريبة دي.
وشغلك مع مروان حامد؟
أنا ومروان حامد متفاهمين جدًا، واللي فرق بينا دفعة واحدة في معهد السينما، مروان درس إخراج وأنا درست تصوير، والعلاقة بينا أكبر من مجرد علاقة عمل.. إحنا فريق حقيقي وأصدقاء. يعني العلاقة بيننا بتتعدى شكل المخرج والسيناريست.
من وجهة نظرك ليه رواياتك بتحقق مبيعات كبيرة؟
مش معنى إن روايات بتحقق مبيعات إنها أفضل كتب في السوق، هدفي من الكتابة إن الناس تستمتع بكتبي وتنبسط وفي نفس الوقت تفكر، والحكم على جودة وقيمة أي رواية ممكن ييجي بعد 20 سنة من ظهورها، والتاريخ بس هو اللي هيحدد إيه الروايات الأهم في كل مرحلة.
وإيه الجديد؟
أنا شغال حاليًا على رواية جديدة هتنزل في 2018، ومستني بداية تصوير فيلم تراب الماس مع المخرج مروان حامد، واللي هيقوم ببطولته آسر ياسين وهيكون من إنتاج نيو سينشري.
عن أحمد مراد
كاتب ومصور ومصمم جرافيك مصري من (مواليد القاهرة 1978)، تخرّج في مدرسة ليسيه الحرّية بباب اللوق عام 1996 قبل أن يلتحق بالمعهد العالي للسينما ليدرس التصوير السينمائي، وتخرّج عام 2001، ونالت أفلام تخرّجه “الهائمون – الثلاث ورقات – وفي اليوم السابع” جوائز للأفلام القصيرة في مهرجانات بإنجلترا وفرنسا وأوكرانيا.
بدأ مراد كتابة روايته الأولي “فيرتيجو” في شتاء عام 2007، ونُشِرت في نفس العام عن دار ميريت قبل أن تُترجم للّغة الإنجليزية عن دار بلومزبيري، ثم للإيطالية عن دار مارسيليو، والفرنسية عن دار فلاماريون ,ثم تحولت الرواية لمسلسل تليفزيوني في رمضان من عام 2012 بعنوان فيرتيجو بطولة هند صبري، ونالت الرواية جائزة “البحر الأبيض المتوسط للثقافة” لعام 2013 من إيطاليا.
في فبراير 2010 أصدر مراد روايته الثانية بعنوان “تراب الماس” وتُرجمت للإيطالية عن دار مارسيليو وللألمانية، ويستعد لتقديمها في فيلم سينمائي.
وفي أكتوبر 2012 صدرت روايته الثالثة “الفيل الأزرق” والتي نالت المركز الأول في مبيعات الكتب بمعرض القاهرة الدولي للكتاب 2013 ثم فازت بجائزة القائمة القصيرة لجائزة البوكر العربية عام 2014.
تم تحويل الرواية لفيلم سينمائي بعنوان “الفيل الأزرق” بطولة كريم عبد العزيز، وخالد الصاوي ونيللي كريم.
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
