The Definitive Guide to Living in the Capital , Cairo , Egypt

الأوريجامي واحد من أجمل الفنون اللي ممكن يتم ممارستها، متعة طي الورق وصناعة منه أشكال إبداعية مميزة. ومحمد جمال، الفنان المصري صاحب مشروع “جيمي جامي” الفني، قدر يتعلم فن الأوريجامي، ويبدع فيه، مش بس كده، ده قدر كمان يوصل لمرحلة متقدمة، وبقى يصنع مجسمات ثلاثية الأبعاد لشخصيات مبهرة.. في الموضوع ده هنعرفكم أكتر على مشروع “جيمي جامي” الفني للمجسمات الورقية.

محمد جمال حسن، أو جيمي جامي، شاب مصري عمره 23 سنة، وهو في الأصل مهندس معماري، لكنه بدأ يكتشف شغفه بفن الأوريجامي عن طريق الصدفة وهو في المدرسة، ووقتها كان عنده 9 سنين، وبعدين بدأ طريقه لتطوير نفسه، وقدر يستخدم فن الأوريجامي في دراسته للهندسة، لأن العملي عنده كان كله يدوي عن طريق صناعة ماكيتات ومجسمات، وهو استغل مشروعات الكلية في أنه يربطها بفن الأوريجامي.

جيمي بيقول لموقع “كايرو 360” إنه جرب كتير من الهوايات اللي لقى نفسه ميال ليها، لكنه عشق المجسمات الورقية، واللي لقى فيها شغفه الحقيقي، وبعدها قرر يطور فن المجسمات الورقية عن طريق الممارسة والتجربة وأنه بيعمل أشكال ثلاثية وثنائية الأبعاد، زي أشكال الحيوانات والشخصيات الكرتونية الشهيرة.

كل مجسم بياخد من جيمي 5 ساعات على الأقل في صناعته، وبيبدأ بمرحلة التصميم للشكل المراد صناعة مجسم له، وبيكون تصميم ثلاثي أو ثنائي الأبعاد ببرنامج متخصص، وبعدين بيتم الطباعة بنظام ثنائي الأبعاد، وبيبدأ بعد كده القص واللزق للشكل، ومن أصعب الأشكال اللي اشتغل عليها وعملها هو شخصية “سبايدر مان”.

مشروع “جيمي جامي” الفني بيهدف لنشر الفن ده أكتر ويكون معروف بين الناس، وكمان من أهدافه تعليم كل المهتمين أهمية الفن ده وكيفية الإبداع فيه، كمان المشروع بيوفر خدمة بيع المجسمات لكل المهتمين باقتناء الفن ده، والاسعار معقولة بدرجة كبيرة، وتقدروا تختاروا الشخصية والألوان بنفسكم.

تقدروا تعرفوا أكتر عن المشروع من خلال صفحة الفيسبوك من هنا.

أو من خلال إنستجرام من هنا.