جرينش: فن إعادة التصنيع من خلال ورش مجانية للأطفال
Nagla Ashraf
كثير من الشباب بيستسلموا مع أول فشل في طريقهم بس الاستسلام عمره ما كان اختيار للناجحين. تجربة النهارده عن “جرينتش” مشروع ناجح لشابين حبوا يحولوا شغفهم واللي اتعلموه في حياتهم لدورات تدريبية للأطفال والكبار في الرسم وإعادة تدوير المخلفات بشكل فني وورش الحكي والتمثيل.
تنفيذ مشروع التخرج على أرض الواقع
مدحت بنزهير خريج فنون تطبيقية 2011 وقرر أنه بعد ما يتخرج على طول يشتغل على مشروع تخرجه الخاص اللي اشتغل عليه أثناء الدراسة بتعليم الأطفال “إعادة تدوير المهملات بشكل إبداعي”. وفضل يعمل ورش عمل بشكل متقطع لحد ما اتقبل في دبلومة للفنون التقليدية والحرف اليدوية تبع برنامج جميل لمنح الجامعة الأميريكية، وقرر أنه يلف محافظات مصر ويعلم الأطفال في القرى الفقيرة الرسم والتلوين وإعادة تصنيع زجاجات المياة المرمية بتلونيها. وفعلًا لف محافظات كثيرة في مصر وقرى مهمشة لمدة 12 يوم متواصلين من القاهرة للبحر الأحمر زي حماطا وسيوة وبعض القرى في نويبع ودهب.
وأتعرف في رحلته دي على شريكه في الحلم شادي عبد الله واللي برغم أنه متخرج من حاسبات ومعلومات إلا أن شغفه بالمسرح والفن وعمل ورش عمل للأطفال والكبار في فن الحكي والتمثيل خلاهم يبقوا أصدقاء.
جرينتش
بدأت فكرة “جرينتش” بعد الرحلة دي لأنهم لاقوا أنهم نفسهم يروحوا لكل قرى مصر الفقيرة واللي فيها أطفال مبدعين بس محتاجين شوية اهتمام وتوجيه. فقرروا أنهم يعملوا جرينتش، ويعملوا من خلاله ورش عمل للناس العادية بفلوس في المجالين إعادة تدوير الفن والحكي، وجزء من ربح الدورات دي هيروح لدورات الأطفال في العشوائيات والقرى الفقيرة. الفكرة بقت محتاجة تمويل أكبر علشان تستتمر وده اللي خلاهم يعملوا ورش بفلوس للناس سواء كبار أو صغيرين.
من مجرد تعليم الأطفال لمشروع مربح
مشروع جرينتش لسه بيبدأ بس محتاج شوية دعم وأن الناس تعرف عن فكرتهم أكتر ويبدأ كل حد عنده موهبة يتجه للأطفال ويعلمها لهم خاصة الأطفال اللي ماعندهمش رفاهية الأنشطة في المدارس الحكومية. وجرينتش مستعدة تساعد أي حد متحمس للفكرة وناوي يضحي بشوية وقت ومجهود علشان يسعد أطفال تانيين مشتاقين لحبة فن وضحك من القلب.
كمان المفروض مستقبليًا جرينتش هتوفر ورش لأهالي المناطق تخليهم يعملوا منتجاتهم الفنية الخاصة اللي يقدروا يبيعوها ويكسبوا من العائد المادي بتاعها.
جرينش بيقدموا ورش باستمرار وتقدروا تتواصلوا معاهم من خلال صفحتهم على الفيسبوك هنا.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
