The Definitive Guide to Living in the Capital , Cairo , Egypt

الصورة: محمد موسى

تعرف شارع المعز؟ زرته قبل كده؟ لو الإجابة بأيوة.. يبقى جاوب على السؤال ده؛ جربت تخلص الشارع لآخره؟ تمام.. برضه الإجابة أيوة؟ (كمل معانا باقي الموضوع).

آخر شارع المعز بالضبط عند باب الفتوح.. هتلاقي هناك واحد من أجمل الجوامع اللي هتقف أمامها وتستمتع بها في حاجات كثير.. هتستمتع بالحالة والتصميم والوسع والجمال والنقوش.. والحاكم بأمر الله..

الحاكم:

اللى بدأ البناء في الجامع ده هو الخليفة الفاطمي الخامس العزيز بالله.. لكنه توفى قبل ما يكمل بناؤه.. واللي كمله ابنه الحاكم بأمر الله الخليفة الفاطمي السادس.. وكان رجل كريم جدًا مع كل أطياف المجتمع ومع المسلمين والمسيحيين، كل الناس كانت مبسوطة في عهده.. لكن برضه كان فيه مشاكل في عهده كثير وفتن وحاجات كثير قدر أنه يسيطر عليها لأنه كان حاكم قوي.. وكان حلمه أنه يكمل بناء الجامع ويبقى على اسمه.. هو الخلود اللي بيدور عليه كل الناس.

الخلود:

وعلشان الخلود حاجة صعبة مش سهلة فالجامع تفاصيله كثير.. بدأ بناء الجامع 379 هـ، وانتهى في عام 403 هـ… تخيلوا الوقت قد إيه.. بس لما تروحوا هتعرفوا ليه أخذ كل الوقت ده، مبدئيًا كده الجامع طوله 120 متر وعرضه 113 متر.

ولما حضرتك تروح ناحية واجهته البحرية هتلاقي مأذنتين عاليين ومعمولين بتصميم عبقري.. وكل مأذنة حولها قاعدة هرمية الشكل وتتركب كل قاعدة بقى من مكعبين فوق بعض.. والمكعب اللى فوق راجع لورا شوية علشان يقدر يشيل المأذنة وارتفاعه تقريبًا بيبقى قد ارتفاع سور الجامع.. وطالعة باصة للسما من كل مكعب مأذنة مثمنة وفي نص الواجهة البحرية وبين المأذنتين هتلاقي مدخل الجامع الأثري وهو أول مدخل بارز بُنى في جامع في القـاهرة كلها.. وبيغطي المدخل قبة أسطوانية بطول 5 متر تقريبًا..

ولازم لما تروح تقف هناك عند الباب شوية وتشوف العقد اللي معقودة من الحجر وتتأمل بقايا النقوش البديعة اللي معمولة على الطراز الإسلامي ولما تدخل هتلاقي مساحة كبيرة جدًا وواسعة هتحس فيها أنك جوه عالم ثاني خالص.. عالم مالوش علاقة بنا ولا بعالمنا.. حاجة كده هتخليك تحس بالسلام النفسي هناك..

وفي وسط المساحة الواسعة دي فيه قبة في النص شكلها كانت بير قديم أو حاجة كده للوضوء زمان.. وبعدين تدخل بقى علشان تتفرج على الإيوان اللي جوه وفيه القبلة بنقوشها البديعة وفيه العواميد الكثير اللي مرصوصة بانتظام علشان تقدر تتحمل سقف المكان اللي الناس بتصلي فيه.. هناك هتلاقي حالة من الطمأنينة ومن راحة القلب، هتلاقي ناس بتصلي وناس بتذاكر وناس بتتصور وناس قاعدة بتتكلم وناس قاعدة بتتأمل.. هناك هتلاقي حالة مش عارفين نوصفها، حالة بتتحس بس.. روحوا وحسوها.