The Definitive Guide to Living in the Capital , Cairo , Egypt

احتفالًا بـ عيده الرابع قرر جاليرى المسار فى
الزمالك أنه يجمّع مجموعة من أجمل الأعمال الفنية اللى أتعرضت فى الأربع سنين اللى
فاتوا تحت اسم معرض «جاليرى كوليكشن». المعرض فيه مجموعة من الفنانين الملهمين زى جورج
بهجورى، ليلى عزت، وعادل السيوى، والنتيجة كانت مجموعة غنية وجذابة من المعروضات
الفنية.

لو بصينا على عدد الفنانين الكبير اللى بـ يعرضوا
أعمالهم، نقدر نقول أن المعرض مافيهوش خرم أبرة إلا وفيه لوحة فنية. الرسومات كانت
متعلقة فى مكاتب الإدارة، الممرات وتقريبا أى مكان ينفع يتعلق عليه لوحات. اللوحات
مالهاش ترتيب معين، لوحات خاصة بـ فنانين مختلفين متعلقة عشوائياً فى أماكن
مختلفة.

أفكار مختلفة كثيرة هـ تناسب كل الأذواق، مثلاً، لوحات لطه حسين تتميز ببقع
لونية تشع حيوية بالأضافة لأشكال تجريدية مجسمة منتشرة على اللوحة القماشية، جنبها
لوحة أهدى شوية من إبداع ليلى عزت مرسوم فيها حصانين بألوان باهتة.

فى المعرض لوحات بارزة كثيرة، كمثال؛ قطعة
صممها أحمد فريد فيها ناس على شكل بلوكّات ملونة، شبه ألوان شمع فى علبة. حمدى
عطية بـ يستخدم الطباعة عن طريق تنقيط الألوان لمنظر تجريدى بـ يجسد مناطيد طائرة فى
الهواء، تحت اللوحة تعليق “مدفوع ثمنها بواسطة الصحافة المصورة والفن”.
قطعة ثانية كبيرة من عمر النجدى فيها ملمس زي ما تكون الألوان مخلوطة بالرمل، أو
كأن اللوحة متغطية بحبيبات قرفة لونها أزرق.

فيه لوحات ثانية مبهرة زى لوحات لجورج
البهجورى. واحد من آباء فن الكاريكاتير المصرى، شخصيات بهجورى بـ تتميز باللغة
البصرية المبالغ فيها، المرتبطة بالنوع ده من الفن. لوحة لواحدة فيها شبه من أم
كلثوم وهى ماسكة منديل، وهى بـ تتضرع بشكل ما وعينيها بـ تبص على السماء. خدودها
المدورة والأشكال الكارتونية خلت الشكل النهائى ساحر وحتى جذاب. تحفة تانية من
أعمال بهجورى متعلقة فى غرفة ثانية فى الجاليرى عكس اللوحة الأولانية، بـ يميزها
جوغامق ومعقد.

اللوحة دي نوع ثانى من الفن اللى بـ يدخل فى
تكوينه أكثر من فكرة، لوحة كبيرة ألوانها أقل حيوية من أعماله الأخرى، بس الأفكار
والعناصر المرسومة حيوية أكثر ومتحركة. حصان متشقلب على الركن اليمين من فوق، مع
جمل قاعد وقطاع متلوّن أزرق ممكن يكون بـ يمثل النيل، باقى اللوحة مليانة وشوش وإيدين.
زحمة وعنف اللوحة بـ يحسسوك أن الشخصيات كأنها موجودة فى أوتوبيس زحمة وبـ تحاول
تأخذ نفسها أو تهرب منه. دى كانت أكثر حاجة شدّت انتباهنا.

حاجة ثانية مهمة فى المعرض هى تمثال “الملك
على العرش” لصبحى جرجس. الشخصية غريبة شوية، نقدر نقول عليها أنها لطيفة
ومضحكة وطيبة لسبب ما. أساس الشخصية عبارة عن نموذج تجريدى، الجسم الأسود الصغير
له وش طويل بعيون واسعة وتعبيرات وقورة. إيدين صغيرة بـ تخرج من مكان وراء رأسه
الطويلة وتحته رجلين بارزة، ثابتة على الأرض.

تجميع مجموعة كبيرة من الفنانين تحت سقف واحد
أثبت أنه فكرة هائلة. المعرض مثير وبـ يرضي ذوقك الفني، وكمان بـ يرسم صورة مفصلة
عن المشهد الفنى في مصر.