The Definitive Guide to Living in the Capital , Cairo , Egypt

التمشية في وسط البلد بالقاهرة وزيارة معالمها وشوارعها من أسباب السعادة المنسية، وده لأن الجمال المعماري والتاريخ بيطغوا على كل تفصيلة في أنحاء وسط البلد، ومن أهم الشوارع هناك شارع عماد الدين اللي ارتبط بالفن والفنانين من زمان، وشهد الشارع ولادة كبار الفنانين وعلى رأسهم علي الكسار ونجيب الريحاني، واختلفت الروايات عن سبب تسمية الشارع، يقال إنه اتسمى على اسم شيخ غير معروف، والبعض نسبه لاسم فتوة من الفتوات بتوع زمان واللي كانوا بيحموا الفنانين، ولكن مهما كانت الحقيقة فيظل شارع عماد الدين هو عاصمة الفن في وسط البلد، وعلشان كده هنقولكم على 5 أماكن ترزورهم في الشارع.

 

الأمريكين

البداية على ناصية شارع 26 يوليو “فؤاد الأول”، وتقاطع شارع عماد الدين هتلاقوا قهوة الأمريكين اللي تأسست سنة 1943 وتخصصت في تقديم الوجبات والمشروبات المميزة وذات الجودة العالية.

سينما رينيسانس

بمجرد ما تتمشوا شوية في شارع عماد الدين ومع أول تقاطع وبالتحديد عمارة 8، هتلاقوا سينما “رينيسانس” واللي بتعرض أحدث الأفلام المصرية والأجنبية من خلال 4 قاعات عرض، وهي من أرخص وأشهر السينمات في وسط القاهرة ومعروف عنها المستوى العالي في الخدمة والقاعات.

زاوية

سينما زاوية متخصصة في عرض الأفلام المستقلة الغير هادفة للربح وبتعرض كمان أفلام من المهرجانات من كل أنحاء العالم، وبتساهم في نشر الثقافة السينمائية في القاهرة، وتعتبر من أوائل السينمات من نوعها في مصر.

مسرح نجيب الريحاني

وبعد السينما بمسافة قصيرة هتلاقوا على يمين الشارع مسرح الفنان نجيب الريحاني واللي كان في الأصل قهوة وهو اشتراها وحولها لمسرح سنة 1917 علشان يعرض مسرحياته عليه، وحاليًا بيتم عرض “مسرح مصر” للنجم أشرف عبد الباقي على خشبته.

سينما كوزمس

من الأماكن المخفية اللي مش واخدة شهرة كافية برغم أن تاريخها مميز، وبتعد سينما كوزمس من أعرق السينمات في القاهرة وتم بناءها على نفس طراز سينما أوديون في لندن، وهي أول سينما في مصر متعددة القاعات وبتشمل على 5 قاعات عرض بتستوعب 1200 شخص.