بيت حسن باشا راشد.. افتح أبوابك لولادك الطيبين!
بيت حسن باشا راشد بيت راشد بيوت أثرية بيوت القاهرة التاريخية بيوت مصر التاريخية تاريخ القاهرة
Mohamed Talaat
الصور للفنان عمر الرزاز.
جميلة بيوت القاهرة القديمة. كل حجر، كل قطعة ديكور، كل باب وشباك، وكل تفصيلة من تفاصيل البناء بتقول إننا أمام كنوز تفرح القلب وترضي العين. ومن بيوت القاهرة التاريخية الجميلة، اكتشفنا مؤخرًا بيت مميز وبعيد عن كاميرات وسائل الإعلام، وهو بيت حسن باشا راشد، وده موجود في شارع الرفاعي بالخليفة.
بيت حسن باشا راشد كان في الماضي نقطة تجمع لكتير من المثقفين المصرين والأجانب، وداخل البيت برضه اجتمع معمارين بهدف تنفيذ وإخراج كتاب عظيم وهو “مساجد مصر”، بتكليف من وزارة الأوقاف العمومية سنة 1945، وكان في البيت ده وقتها مطبعة قديمة جدًا وبدائية.
للأسف البيت مغلق حاليًا، وحاولنا نعرف سبب غلقه لكن ماقدرناش. لكننا على الأقل قدرنا نعرف إن تاريخ إنشاء البيت الجميل ده بيرجع لسنة 1920، واللي صممه هو Achille Patricolo، وده كان رئيس القسم الفني بلجنة حفظ الآثار العربية وقتها.
البيت معروف برضه باسم “بيت راشد”، واتبنى على الطراز المصري العربي السائد وقتها، وأكتر حاجة بتميز المكان هي مشربياته الجميلة، واللي اتعملت بشكل فني خلاها مختلفة عن المشربيات المنتشرة في الوقت ده في مصر.
وبحسب صفحة دليل مصر التاريخي على فيسبوك، فالبيت حاليًا عبارة عن دور واحد فوق الأرضي بالإضافة إلى دورين تحت الأرض، وده بعد ما تم هدم دورين علويين في الماضي.
الدور الأول بارز بالكامل فوق الأرضي بكوابيل حجرية، والواجهة جميلة وبتتميز بمدخل بتطل عليه مشربية أسطوانية طويلة، والمشربية الكبيرة بتتميز بثلاث حليات خارجية لأواني الماء (القلل) وفيها ضلف بتفتح للخارج بمفصلات علوية.
البيت من جوه تحفة فنية، سواء في الزخارف أو اختيار الخامات اللي اتنفذت بها الزخارف، ده غير المشربيات الصغيرة اللي اتعملت بطريقة هندسية ذكية بهدف استقبال الهواء، وبسببها أصبح المكان علي مدار النهار والليل وكأن فيه تكييف، والهواء متجدد.
المدهش إن بعض الأعمال الرخامية الداخلية في البيت تم تصنيعها خارج مصر، وفي الوقت ده تم الاستعانة ببعض الفنانين الأتراك والإيطاليين لعمل الزخارف الداخلية.
بنتمنى البيت يفتح أبوابه لعشاق التراث المصري، ووقتها هنفرح جدًا بزيارة بيت جميل، بيحكي عن تاريخ مدينتنا العظيمة؛ القاهرة!
