بيت السناري: ارحع بالزمن في السيدة زينب
Mostafa Maher
علشان ترجع لأيام زمان مش
شرط تركب آلة الزمن، لأنك ممكن تعمل ده في القاهرة، من خلال أكثر من مكان لسه
محافظ على شكله في حين تاريخه ممكن يزيد عن 200 سنة!
في منطفة السيدة زينب جنب
مدرسة السنية في حارة اسمها “يونج” هـ تلاقي هناك «بيت السناري» اللي كان
بـ يملكه تاجر اسمه السناري وأهداه للحملة الفرنسية علشان يكون مكان للعلماء الفرنسيين
أثناء تأليفهم كتاب “وصف مصر”، وأُعيد افتتاح البيت بعد الترميم منذ 6
شهور.
«بيت السناري» بـ يشهد حاليًا
مهرجان “من فات قديمه تاه” من تنظيم مكتبة الإسكندرية في الفترة من 10:
24 يوليو، هناك تقدر تستمتع بالمكان والمقتنيات القديمة المعروضة فيه، كتب قديمة
ومستعملة شاملة كل الموضوعات تقريبًا وروايات عربية وأجنبية، وهـ تلاقي كمان الأعداد
الأولى من جريدة الأهرام ومجلة روزاليوسف، ولافتات قديمة بأسماء بعض الشوارع.
في المهرجان معرض خاص لحسام
عبد الهادي، وهو عنده عدد كبير من المقتنيات النادرة من عصور وبلاد مختلفة، في
معرضه هـ تشوف أول جرامافون وعمره أكثر من 120 سنة وجنبه موجود ثاني جرامافون بـ
بوق وعمره 100 سنة تقريبًا، والجميل أنهم في حالة سليمة وتقدر تشغل عليهم الأسطوانات،
وكمان هـ تشوف عدد كبير من أجهزة الراديو، بداية من أول راديو تم تصنيعه لحد
الراديو الموجود اليوم، في نفس المعرض موجود أول ساعة صناعة مصرية اسمها “تُرماي”
وأول ساعة كاتينة عمرها 140 سنة، وأقدم تليفون واسمه “تليفون التحويلة”
وده كان من غير أرقام، وكمان تليفون العمدة في الريف المصري وتليفون كان بـ يستخدمه
الإنجليز في مصر، والتليفون الملكي المستخدم في قصور الملك.
في نفس المكان هـ تستمتع وأنت
بـ تشوف الساعة الشخصية للملك فاروق وطربوشه الملكي والعملات الموجودة في عصره ومنشة
الذباب الخاصة به، ومقتنيات ثانية للملك.
في ركن النحت هـ تلاقي
الفنان أيمن فرغلي قاعد بـ يدق في الصخر وبـ يصنع أجمل التحف الفنية رغم أنه مش متخصص
لكنه حرفي تلقائي وبـ يقدم فن أصعب كثير من النحت أو التشكيل بالطمي لكنه بـ يقدر
يشتغل في معظم أنواع النحت.
«بيت السناري» عبارة عن مكان
للفن والإبداع، وعلشان كده هـ تشوف هناك أنواع كثيرة من الفنون، منها صناعة السجاد
والحصير اليدوي، والأجمل أنك ممكن تطلب من فنان السجاد يصنع لك سجاد أو حصير بشكل
وألوان أنت تحددها، وتختار المقاس كمان.
معلومات عن بيت السناري:
http://www.egyptarch.com/historicalcairo/islamicmonements/senaryhouse/senarymain.htm
