The Definitive Guide to Living in the Capital , Cairo , Egypt

الصورة الرئيسية رسم للمتحف للفنان الأردني محمود الرفاعي.
هل تعرف أن مصر فيها متحف مخصص لعرض وحفظ فن “الكاريكاتير”؟ لأ وكمان يعتبر أقدم متحف للكاريكاتير في الشرق الأوسط كله، ومؤخرًا أعلنت محافظة الفيوم عن توثيق مبنى المتحف الموجود في شارع إيفلين بقرية تونس السياحية بسجل المنشآت والمباني ذات الطراز المعماري المتميز لمحافظة الفيوم.

تعالوا نتعرف أكثر على المتحف وتاريخه ومقتنياته المهمة.

 

مبدئيًا المسافة من القاهرة للمتحف حوالي 120 كيلومتر، وقرية تونس الموجود فيها المتحف هي قرية ليها طبيعة خاصة، وبيوتها كلها دور واحد، ومبنية بالطوب اللبن.

دخول المتحف مجاني ومؤسسه وصاحب فكرته واللي قام بإنشاؤه بمجهوداته الشخصية هو الفنان التشكيلي “محمد عبلة”، وكان وراء الفكرة في إنشاؤه أصلاً هو مقابلة حصلت بين “عبلة” والفنان الراحل “زهدي العدوي” رئيس جمعية فناني الكاريكاتير السابق، وقاله إنه لو الرسامين احترموا فنهم، ساعتها بس هيحافظوا عليه، وفعلًا قرر “عبلة” إنه ينشئ المتحف ده، علشان يبقى أول معرض متخصص في عرض فن الكاريكاتير في مصر والشرق الأوسط وأفريقيا.

أهم حاجة بتميز المتحف هو إنه بيضم رسومات من مجلات دورية صدرت من سنة 1919 وكانت متخصصة في الكاريكاتير بس، زي مجلات الشعلة، والكشكول، واضحك، والجيل الجديد، ده غير إنه بيضم أكثر من 500 لوحة كاريكاتيرية من بداية القرن العشرين لحد النهارده.

شارك في المتحف عشرات الفنانين بلوحات وأعمال أصلية بتتناول بتعليقات ساخرة موضوعات مختلفة، سواء في السياسة أو في الفن أو في الاجتماع، ده غير إن اللوحات أو الأعمال دي موقعة من أصحابها اللي بقوا أسماء مهمة في فن الكاريكاتير في العالم العربي، زي الفنان والشاعر صلاح جاهين، وجورج البهجوري، وصاروخان، ورخا، وحجازي، وزهدي، وطوغان، وعمالقة كتير غيرهم.