The Definitive Guide to Living in the Capital , Cairo , Egypt

عشاق المسلسلات التليفزيونية على موعد مع حدث مهم هتستضيفه القاهرة وهتتنافس فيه مجموعة من أهم الأعمال الدرامية، وهو مهرجان “أيام القاهرة للدراما العربية”، في الموضوع ده هنتعرف أكتر على المهرجان ده من خلال 5 معلومات فيهم الخلاصة.

1 – إدارة “أيام القاهرة للدراما العربية” أعلنت في الساعات الأخيرة إقامة حفل دورتها الثانية بالمسرح الكبير بدار الأوبرا يوم الأحد ١٩ سبتمبر، والدورة دي هتكون برئاسة الفنانة إلهام شاهين.

2 – هيشهد الحفل توزيع جوائز مسابقة الموسم الدرامي 20/21، واللي بيتنافس فيه السنة دي 22 مسلسل عرضوا على التليفزيون والمنصات الإلكترونية المختلفة، وهي الأعمال اللي اختارتها لجنة التحكيم علشان تنافس على الجوائز.

3 – بيشارك في “أيام القاهرة للدراما العربية” دول مختلفة هي: مصر، ولبنان، والسعودية، والإمارات، والجزائر، والكويت.

4 – تم اختيار دولة تونس علشان تكون ضيف شرف دورة السنة دي من المهرجان، وده بمناسبة احتفالات عام الثقافة المصرية التونسية.

5 – الفنانة يسرا هي اللي ترأست الدورة الأولى من مهرجان “أيام القاهرة للدراما العربية”، اللي أقيمت وقتها في معهد العالم العربي بباريس.