The Definitive Guide to Living in the Capital , Cairo , Egypt

الهيئة العامة لقصور الثقافة هتطلق النهارده الأحد 16 فبراير 2020 فعاليات الدورة الـ 8 لمهرجان أسوان الدولي للثقافة والفنون، واللي هيكون بمشاركة 24 فرقة دولية ومحلية، وهيستمر لحد يوم 22 فبراير الجاري، وعلشان تتعرفوا أكتر على المهرجان هنقولكم على أهم المعلومات عنه.

بيعتبر مهرجان أسوان الدولي للثقافة والفنون فرصة حقيقية لتبادل الثقافات بين الشعوب، ودي الدورة رقم 8 للمهرجان، وبيتم تنظيمه بمشاركة من هيئة قصور الثقافة ووزارة السياحة والآثار ومحافظة أسوان وهيئة تنشيط السياحة في منطقة أبو سمبل.

المهرجان بيهدف لتقديم مجموعة كبيرة من الفنون التراثية، وبيهدف كمان لنشر رسالة سلام من مدينة السحر والجمال “أسوان”.

من أهداف المهرجان المهمة هو تنشيط السياحة في مصر، خاصة مع مناسبة تعامد الشمس على تمثال رمسيس الثاني، وده بيكون يوم تتوجيه كملك لمصر، يوم 22 فبراير، وطبعًا الظاهرة دي واحدة من 4500 ظاهرة فلكية عرفها القدماء المصريين في العصور المختلفة.

المهرجان بدأ أول دورة له في 2013، وشاركت فيه وقتها 7 فرق من دول مختلفة، لكن السنة دي وفي الدورة الـ 8 منه، هيكون فيه 14 فرقة من دول أجنبية، وده غير 10 فرق تابعة لقصور الثقافة متخصصة في الفلكلور المصري.

وبعيدًا عن العروض الفنية، هيتم تنظيم عروض لكل الفرق على مراكب شراعية في النيل، واللي هتقدم عروض مختلفة متاحة للجميع ببلاش، وكمان هيتم إطلاق بالونات في سماء أسوان هترفع علم مصر.