The Definitive Guide to Living in the Capital , Cairo , Egypt

لما تكون موهبتك إنك ترسم أو تلون أو تلعب لعبة معينة فده ممكن يبان طبيعي عند معظم الناس، لكن لما تكون هوايتك إنك تخلي الناس تشرب قهوة على ريحة وطعم معالم مصر السياحية، أو إنك تشرب قهوة بطعم وريحة كوبري ستانلي في الإسكندرية وأنت في القاهرة، فدي موهبة محتاجة نقف عندها شويتين تلاتة.

“ندى هاني” بنوتة مصرية عندها 20 سنة، موهبتها هي رسم معالم مصر السياحية على أكواب القهوة، علشان تنقلك بقهوتك فين ماتكون للمكان المرسوم على كوبايتك، وهدفها في ده الترويج للسياحة ولتزيين الكوبايات كمان.

رسم “ندى ماكانش بس للمعالم السياحية المصرية، لأ كمان للمعالم التاريخية القديمة، لكن المميز في الموضوع أكتر، هوه طريقتها الخاصة في الخطوط والرسم والتلوين، واللي بتبعد بيها عن الرسم والشكل التقليدي، فتحس إن ليها شخصية فنية متميزة ومختلفة، وعلشان كده أول خطوة في طريق الاختلاف والتميز ده كانت اختيارها للوحاتها اللي هترسم عليه واللي كانت الأكواب.

والد “ندى” كان هوه أول حد يكتشف موهبتها، واللي ظهرت وهي عندها 5 سنين زي ما قالت لموقع “العين” وبعد اكتشاف الموهبة دي، بدأ أبو ندى يقف جمبها ويساعدها على تنميتها، علشان تحقق حلمها بدخولها كلية الفنون الجميلة، علشان تنمي موهبتها بشكل علمي، وخصوصًا إنها عاشقة للرسم زي ما بتقول.

في الثانوية العامة ندى جابت مجموع يدخلها طب أو هندسة، لكن مع ذلك ندى فضلت تدخل كلية الفنون الجميلة لعشقها الرسم زي ما بتقول.

ندى بتعتبر إن رسمها لقلعة قايتباي في الإسكندرية، أو كوبري ستانلي، أو مكتبة الإسكندرية، أو برج القاهرة على أكواب هي مجرد بداية لأحلامها وطموحتها، وحطت قدامها أهداف كتيرة، منها رسم الأهرامات والتحف الفرعونية، وبعض الشخصيات المصرية العامة والعالمية، على لوحتها الفنية، اللي هي الأكواب.

بعد ما عرفناكم بـ “ندى” .. لو حابين تشوفوا رسمها وفنها، ممكن تتابعوها من خلال حسابها على إنستجرام من هنا.