The Definitive Guide to Living in the Capital , Cairo , Egypt

عشاق أغنية 3 دقات على ميعاد مع أغنية جديدة مميزة للمطرب “أبو”.. اللي هيطرح أغنيته الجديدة بعنوان “اتفرعن” بمناسبة مشاركة منتخب مصر فى كأس العالم روسيا 2018.

والأغنية من كلمات وألحان أبو، وتوزيع موسيقي رامي سمير وتم تصوير الأغنية بطريقة الفيديو كليب في عدد من المناطق السياحية في مصر، في محاولة فنية لتجشيع السياحة، والكليب من إخراج أحمد النجار.

وطبعًا كلنا عارفين إن أشهر اغنية للمطرب أبو هي “3 دقات” التى قدمها مع الفنانة يسرا فى مهرجان الجونة السينمائى، وله أغنية تانية ناجحة اسمها “مسافر” مع الفنان الكبير أحمد عدوية.

أبو العينين…البداية من الثورة

اسمه بالكامل محمد أبو العينين فاختصره لـ(أبو)، ومن هنا جه الأسم المميز اللي اتعود إن أصحابه ينادوه بيه من صغره، كان شغال مدير في شركة أمريكية لمدة 7 سنين، لكنه في 2012 قرر يتجه لهوايته في الكتابة والتلحين، ويمشي على نهج مختلف في الأغاني يناسب خامة صوته الرجولية المميزة.

مواضيع جد..خوف وغربة وسفر

الجميل في أبو، أنه مركزش في الرومامسية بس، عمل زي أي محترف أندرجرواند وغنى مواضيع تهم الشباب والجيل، فكانت أغنيته التانية (أكسجين) عن المساواة والتآخي بين كل فئات البشر، مع بساطة برضه في اللحن الكلاسيك واللبس، حاجة معبرة من غير تعقيد (لا تقولي لون ولانوع ولادين.. ولاعنده ايه ولا دا ابن مين.. كلنا عايشين .. نتنفس اكسيجين ).

ويغني بعد كده عن المواجهة مع الظروف وعدم الخوف في أغنية (مش هخاف)، برسومات جرافيك المرة دي وكليب كله رموز ومعاني، وكأنه بيقول لنفسه كمل ومتخافش في طريقك، (هفضل يادنيا افرح واعيش واضحك في وشك وهطير بيكي لفوق بـ ارادتي مش ارادتك…مش هخاف )، ونهاية الأغنية مع الكورال حماسية جدًا في الحقيقة.

أما الدويتو الأول ليه فكان مع المخضرم أحمد عدوية في أغنية (مسافر)، عن الغربة وصعوباتها، الهارموني بين الاتنين كان عالي فعلاً، عشان الصوتين فيهم الرجولة والعذوبة، غير فكرة الديو على شكل مونولوج بين الاتنين، عدوية الناضج الحكيم بينصح (أبو) الشاب اليائس اللي ناوي يسيب البلد.

اعرفوا أكتر عن “أبو” من هنا