The Definitive Guide to Living in the Capital , Cairo , Egypt

“داليا السعدني” إسم هنسمعه كتير الفترة الجاية، لإنه ببساطة اتحفر بحروف من نور في كتاب العظماء المصريين، المهندسة المصرية “داليا السعدني” فازت بالجائزة الذهبية في مسابقة  A’Design Award الدولية في إيطاليا، عن مشروعها التصميمي لأول متحف نوعي  عملته في الجريك كامبس في الجامعة الأميركية في القاهرة، وبيتناول المتحف الاكتشاف الأخير حوالين سر جديد من أسرار القدماء المصريين، وكونهم أول من ابتكروا فكرة الأمن المعلوماتي، وكل ما له علاقة بالعلم وحمايته.

مسابقة A’Design Award تعتبر واحدة من أكبر وأهم الجوائز في مجال التصميم، وبيتنافس فيها عدد كبير من المصممين في أكثر من 105 مجال في التصميم من مختلف أنحاء العالم.

“داليا” واحدة من أشهر 100 شخصية معمارية عالميًا، سواء في مجال العمارة أو التصميم، وده لإنها قدرت تظهر التقاليد المصرية في فنونها المعمارية الأصيلة، وبكده ساهمت في رفع قيمة الصورة العالمية لمصر.

سعادة داليا بالجايزة كانت كبيرة، وده لإنها قدرت من خلال تصميمها للمتحف اللي تناول قضية مهمة وهي “الأمن المعلوماتي” من أيام القدماء المصريين، تثبت إن أي علم من العلوم الحديثة كان ليه جذور عند المصريين القدماء.

 المتحف مش سهل في تنفيذه، وكان تحد وحافز لكل مصري بأنه يتعرف على تاريخه زي ما قالت داليا لجريدة “الحياة” اللندنية، وعلشان كده داليا عملت أبحاث ودراسات ووثقتها في دراسة كبيرة بالعربية والإنجليزية، وبمساعدة من عدد من علماء المصريات، اللي ساعدوا داليا في بناء دور كامل في المتحف تناول أصل المعلومات وحمايتها في مصر زي ما قالت.

وقالت داليا إن أجدادنا كانوا أول من اكتشف أهمية حماية المعلومات وطرق حفظها، وبحسب كلامها فالعلماء لقوا تشابهات كتيرة بين وسائل الأمن المعلوماتي اللي استخدمها المصريين القدماء وبين وسائل الأمن المعلوماتي اللي بنستخدمها في وقتنا الحالي والمتمثلة في الـFirewall  وDeep Web  وPassword  وanti-Virus وMaze  وHoney Pot  وغيرها من الأمور اللي اكتشف إن ليها أصول عند القدماء المصريين.