The Definitive Guide to Living in the Capital , Cairo , Egypt

أتوبيس أبيض اللون، مليان بالكتب والقصص الشيقة الموجهة للأطفال، بيلف في مصر يدور على الأماكن اللي مافيهاش مكتبات أو وسائل ترفيه وتثقيف للأطفال، وبيوفر لهم فرصة لقراءة أجمل القصص اللي بتتكلم عن الحضارة المصرية، دي باختصار هي فكرة المكتبة المتنقلة التابعة لجمعية مصر الجديدة ومكتبة مصر الجديدة.

 

يوم الثلاثاء 10 سبتمبر الجاري، وصلت المكتبة المتنقلة للمتحف اليوناني الروماني بمحافظة الإسكندرية، وركنت أمام المتحف مباشرة. المكتبة دي هدفها هو إثراء المعرفة للأطفال في كل مكان بعيد عن المكتبات العامة، وبتقوم بأنشطة مهمة، زي عرض القصص اللي بتتناول تاريخ الحضارة المصرية بطريقة ممتعة، بالإضافة إلى الرسم ونشاط التلوين لشخصيات القصص اللي بيتم قراءتها ومناقشتها.

المكتبة المتنقلة لجمعية مصر الجديدة عبارة عن أتوبيس كبير مزود بأعداد من الكتب المختارة والمتميزة، وبتضم رفوف للكتب ومواقع جلوس الزوار أثناء توقف الأتوبيس، وبتقوم بالمرور بصفة دورية على الأحياء والمناطق اللي بتفتقر لوجود مكتبات، علشان يستفيد منها أكبر عدد من الأطفال.

وبتتوقف المكتبة المتنقلة في أماكن مختلفة زي النوادي الرياضية ومراكز الشباب ومراكز ذوي الاحتياجات الخاصة والأماكن والحدائق العامة والجامعات وده بالتنسيق مع مؤسسات الدولة الحكومية والخاصة.

وبتستهدف فعاليات المكتبة فئات عمرية مختلفة، بالإضافة إلى الأطفال ذوي الهمم وأصحاب الإعاقة الذهنية.

وبتهدف المكتبة المتنقلة لجمعية مصر الجديدة برئاسة الدكتور نبيل حلمي، لنشر المعرفة وثقافة القراءة للأطفال والناشئة، وده من خلال أنشطة تفاعلية بتثري الجانب المعرفي، وبتنمي شغف الاطلاع عند الأطفال، وأحيانًا الكبار.