الجيزويت: جمعية ثقافية متكاملة

فن وثقافة

جيزويت القاهرة

- 01/02/2012

الجيزويت: جمعية ثقافية متكاملة

15 شارع المهراني
0225920909

تم التقييم بواسطة

Mostafa Maher

قيم

قيم الآن

أحيانًا بـ نكون عاوزين نروح مكان بسيط فيه نشاطات
ثقافية وفنية مختلفة، وغالبًا ساقية عبد المنعم الصاوي هو أول مكان بـ ييجي على
بالنا وبـ ننسى أماكن كثيرة مهمة منها “جمعية النهضة العلمية والثقافية
جيزويت” أو زي ما مُعظم الناس بـ تختصر وتسميه “الجيزويت”.

الجمعية مقرها الرئيسي في منطقة الفجالة وتحديدًا في مقر
ستوديو سينمائي أنشئ في الثلاثينات اسمه “ناصيبيان” وكان من أهم ستوديوهات
مصر، اتصور فيه أكثر من 140 فيلم منهم: باب الحديد، الحفيد، شفيقة ومتولي، وأفلام
كثيرة لأنور وجدي وإسماعيل ياسين وعادل إمام وغيرهم.

الجمعية هدفها الأساسي الارتقاء بالفنون وأن يكون من حق
الجميع أنهم يتعلموا السينما والكتابة والمسرح والمزيكا والتصوير بكل أنواعه وده
من خلال الورش اللي بـ تقدمها الجمعية على مدار السنة -بدون مقابل- وبـ تستعين
أحيانًا بفنانين عالميين في تدريب المشتركين، ومن أشهر ورش الجمعية “مدرسة
السينما” اللي خرجت أكثر من دفعة بعضهم بـ يشتغل حاليًا في السينما
والتليفزيون، ومن خلال الورشة دي تقدر تتعلم كل شيء في السينما في 6 شهور، وفي
نهاية الورشة هـ تقدر تصنع فيلم روائي قصير بنفسك بعد ما تكون تعلمت الكتابة والإخراج
والمونتاج وهندسة الصوت والجرافيك.

كمان الجمعية مشهورة بمهرجان سنوي اسمه
“الفجالة” بـ يتكلم عن منطقة الفجالة اللي عمرها زاد عن 100 سنة، ومن
خلال المهرجان ده بـ يتم عمل معارض للفن التشكيلي والفوتوغرافيا، وعرض أفلام
تسجيلية ووثائقية مستقلة، وحفلات كورال وغناء، وكمان بـ يتم عرض بعض الأفلام العالمية
-اللي حصلت على جوائز عالمية- في قاعة السينما الموجودة داخل الجمعية، وأحيانًا بـ
يتم عمل ندوة بعد الفيلم بحضور نقاد وكتاب سينما بـ يناقشوه.

بمجرد دخولك مقر الجمعية هـ تشعر بالهدوء خاصة أن المكان
مُنظم وعادة مش بـ يكون زحمة رغم مساحته المحدودة، لكن هـ تلاقي الموظفين
والمسئولين عن المكان مبسوطين بوجودك وحابين يشرحوا لك نشاطاتهم وإزاي تقدر تشارك
معاهم. الجمعية ممكن تساعدك لو كنت بـ تحاول تصور فيلم أو معاك فرقة مسرحية وعاوزين
تعرضوا في مكان مناسب، كمان تقدر من خلال الجمعية أنك تعرض فيلمك أو لوحاتك أو
صورك في معارض بـ يتم تنظيمها بشكل جيد. ومش كل العروض بـ تكون في مقر الجيزويت
لكن أحيانًا بـ تكون في أماكن مختلفة في القاهرة ومحافظات الوجه القبلي والبحري
وبعض المراكز الثقافية الأجنبية، وأحيانًا ممكن يكون العرض خارج مصر لأن الجمعية
مشتركة مع أكثر من دولة في مشروعات ثقافية مختلفة.

نصيحة 360

علشان توصل لمقر الجمعية لازم توصل لميدان رمسيس ومن هناك تمشي ناحية الفجالة وتدخل من جنب مدرسة الجيزويت، هـ تلاقي السور لونه أصفر وعليه رسومات، امشي مع سور المدرسة واتجه يمين في شمال هـ تلاقي نفسك في شارع المهراني وهو ده الشارع اللي فيه الجمعية.