البهجة في الزمالك.. دليلك لحفلات ساقية الصاوي في عيد الفطر 2023
أماكن ثقافية في القاهرة برنامج الساقية في العيد حفلات عيد الفطر 2023 حفلات في القاهرة ساقية الصاوي عيد الفطر
Cairo 360
يمنى أحمد
العيد في كل مكان حلو، لكن في القاهرة بالذات فيه أماكن مؤكد إنها بتسحب مننا أي ضيق ممكن يكون فينا في اليوم ده، الأماكن دي قادرة إنها تزرع جوانا شعور بالسعادة وتبهجنا مجرد ما ندخلها. ساقية عبد المنعم الصاوي بالزمالك واحدة من الأماكن دي، فريق العمل فيها دايمًا مركز على كل اللي يبسط الناس في الأيام العادية، علشان كده جدولهم في العيد مبهج وكله خفة وجمال. بينا نشوف تفاصيل حفلاتهم في عيد الفطر 2023!
حفل عمرو حسن
قاعة النهر بتستضيف الشاعر عمرو حسن يوم السبت ٢٢ إبريل، واللي بيوافق تاني أيام عيد الفطر في حفلتين، الأولى الساعة 4:30 والثانية الساعة 7:30. ودي فرصة كويسة جدا لأي كابلز علشان يقضو وقت حلو، وكمان ممكن تاخد صحابك وتستمتع بوقت جميل هناك. أما التذاكر فأسعارها بتبدأ من 220 جنيه مصري.
حفل بلاك تيما
وده هيكون يوم الأحد 23 أبريل الموافق تالت يوم العيد، في قلعة النهر برضو الساعة 7 مساءً، الفرقة دي ليها شعبية كبيرة واللي بيميزها إنها بتجمع بين الموسيقى الشرقية والغربية وبتعبر عن الآلآم والطموحات والعاطفة في وقت واحد، متنساش تاخد أصحابك وتروح، تذاكر الحفلة بتبدأ من 150 جنيه.
حفل طبلة الست
ودي مجموعة من السيدات بتقدم عروض مختلفة حلوة أوي، ممكن تروح تحضر هناك في قاعة النهر برضه يوم الإثنين الموافق 24 أبريل واللي هو رابع أيام عيد الفطر، الحفلة هتكون الساعة 7:30 مساءً، والتذاكر 150 جنيه.
مهرجان أمبيسا
أما هنا ففريق العمل قرر يعمل نسخة مصغرة من الحياة في النوبة، فهيقدم عروضهم ومحاكاة لحياتهم، الناس اللي بتحب السمار والحياة المصرية الأصيلة يقدروا يروحوا هناك يوم 25 أبريل الموافق خامس يوم العيد الساعة 7:30 مساءً، والتذكرة بـ 120 جنيه.
حفل علي الحجار
قاعة النهر هتستضيف الفنان علي الحجار وده هيكون يوم 29 أبريل، تاسع أيام عيد الفطر، وهيكون الساعة 8 مساءً وتذكرته 230 جنيه.
