أولهم إسكندرية.. قصة أقدم 3 سينمات في مصر
أفلام تعرض في السينما أقدم سينما في القاهرة أقدم سينما في مصر تاريخ السينما المصرية سينمات القاهرة
Mohamed Talaat
دور السينما في مصر من أقدم سينمات الشرق الأوسط والعالم، ودايمًا كانت سابقة بخطوات كتير عن دول تانية، ودايمًا متميزة في حاجات كتير وأهمها العروض اللي بتتقدم فيها، وبدأت السينمات في مصر بالظهور في 1895 وكل سينما كان ليها حكايات وروايات كتبها التاريخ، ولأهمية الفن في حياتنا ودور السينما بشكل خاص هنقولكم على أقدم 3 سينمات في مصر وتاريخ تأسيسهم.
مبنى السينما حاليًا بعد غلقها
طوسون باشا
سينما بورصة طوسون باشا هي أقدم سينما في مصر كلها واشتغلت سنة 1896 واللي اشتغلت بعد ظهور أول فيلم تجاري في العالم وكان بيتعرض في باريس سنة 1895، وهي كانت موجودة في شارع فؤاد باشا في الإسكندرية، وكانت بتعرض أفلام قصيرة وبتشتغل من 5 مساءً حتى 11 مساءً، واتكونت من عدة طوابق وقاعات.
أوليمبيا
أما القاهرة فأول سينما فيها وتاني سينما في مصر كلها كانت في شارع أرض شريف بالعتبة، ولسه لحد دلوقتي أشلاءها موجودة، وهي كانت أرض ملك رئيس وزراء مصر أهداها للشيخ سلامة حجازي علشان يبني مسرح نظرًا لحبه للفن، واتحول المسرح على يد مسيو باردي لسينما سنة 1911 وأطلق عليها اسم “أوليميبا”، وهي أول سينما كان فيها ترجمة للأفلام عن طريق الألواح الزجاجية، وكتب نجيب محفوظ عنها وقال “دخلت أول مرة للسينما ومعي والدي، وعندما أتى القطار مسرعًا على الشاشة صرخ فزعًا”.
فريال فاروق
تخيلوا بقى أن ثالث أقدم سينما في مصر كانت في محافظة قنا أقصى جنوب القاهرة، وأنشأها لوقا بسطا وأخواته في ثلاثنيات القرن الماضي، وكان اسمها على اسم الأميرة فريال ابنة الملك فاروق، واللي كان بيديرها والد الفنانة فاتن حمامة، وللأسف السينما دي اتهدت نهائي عن طريق ملاكها رغم كل الاغراءات اللي قدمتها الدولة للملاك علشان يحتفظوا بيها ويبنوا فوقيها محلات، وده الفرق بين العقل المصري زمان ودلوقتي.
مقترح
فن وثقافة
طبلة الست.. فرقة غنائية بتنشر الفرح وتحيي التراث
حفلات طبلة الست حفلات غنائية في القاهرة +5
الحياة في كايرو
