أوسكار 2017: حكايات وجوائز وأخطاء فادحة!
Mohamed Hamdy
كتب: محمد حمدي
الشيء الأهم اللي انتظره كتير من محبي السينما ومتابعيها في نهاية شهر فبراير الحالي.. كان حفل توزيع جوائز الأوسكار لعام 2017.. الجائزة اللي بتعتبر أفضل وأهم وأقوي جائزة على مستوى العالم للأفلام، ويمكن تشبيهها بجائزة نوبل لكن في مجال السينما.. تعالوا نشوف مع بعض إيه اللي حصل في حفل تسليم الجوائز.. ومين اللي كسب الجائزة الأهم في العالم لعام 2017؟
أهم شيء حصل في الحفلة الليلة الماضية، كان الخطأ الضخم في إعلان اسم الفيلم الفائز بجائزة أفضل فيلم. فتم الإعلان بالخطأ عن فوز فيلم Lala Land وبعد صعود أبطال الفيلم على خشبة المسرح تم الإعلان عن الخطأ، والتأكيد علي أن الفائز بجائزة أفضل فيلم هو فيلم MoonLight !
حالة من الدهشة أصابت عدد كبير من المشاهير حول العالم كانوا بيتابعوا الحفلة بشكل مباشر في قاعة الاحتفال، وطبعًا حالة أكبر من الدهشة والتعجب أصابتنا كمتابعين من البيت، حتي أن عدد كبير من المشاهير كتبوا على موقع التواصل الاجتماعي (تويتر) يحكوا عن الواقعة، ومنهم ملكة جمال العالم اللي قالت أن كان المفروض المسئولين عن الأوسكار يرجعوا للمسئولين عن حفلات ملكة جمال العالم لأنهم أدرى بالتصرف في الأمور دي، وكانت هنا تقصد الخطأ المرعب اللي حصل سنة 2015 لما تم الإعلان عن اسم ملكة جمال العالم بشكل غلط ثم إعادة تصحيح الخطأ.
على كل حال أعلنت الجهة المنظمة للحفل عن فتحها لباب التحقيق في الواقعة، واعتذرت لأبطال الفيلمين، ومع انتهاء واحدة من أغرب الوقائع في واحد من أغرب حفلات الأوسكار، تعالوا نستعرض مع بعض الفائزين بالجوائز.
أوسكار أفضل فيلم
Moonlight
والفيلم بيحكي قصة معاناة طفل أسود بيكبر في حي ميامي المعروف بمشاكله الكبيرة، وقصة تطوره من مرحلة الطفولة لمرحلة المراهقة والنضج، ومحاولاته اكتشاف نفسه اللي بتحصل في وقت متزامن مع محاولاته إنه يخلق لنفسه مكان في العالم الواسع واللي مش بيرحب بيه.
أوسكار أفضل ممثل
كاسي أفليك عن Manchester by the Sea
وقام كيسي في الفيلم بدور رجل بيتعرض لحادث ضخم بيفقد على أثره الرغبة في التواصل مع الناس، وبيتحول لشخص غريب الأطوار، حتى يأتي اليوم اللي بيتلقي فيه اتصال بيعرف فيه وفاة أخيه، وأنه أصبح الوصي على أبن الأخ المراهق.. الأمر اللي بيغير حياته بالكامل ويرجعه تاني لعالم الذكريات اللي بيحاول ينساها.
أوسكار أفضل ممثلة
إيما ستون عن La La Land
ويعتبر فيلم لالا لاند واحد من أكتر الأفلام اللي حصدت جوائز أوسكار في حفل 2017، والفيلم بيحكي عن قصة حب بين ممثلة شابة وعازف موسيقى، وقصة صعودهم مع بعض في عالم الفن. الصعود اللي بييجي معاه تمن غالي، وهو التأثير على علاقة الحب بين الاثنين، وإزاي هيقدروا يوفقوا بين النجاح العملي وبين الاستمرار في الحياة العاطفية.
أوسكار أفضل ممثل مساعد
ماهرشالا علي عن Moonlight
وكان فوزه متوقع بعد أداؤه في الفيلم الحاصل على جائزة أوسكار أفضل فيلم، وعلى فكرة ماهرشالا يعتبر أول مسلم يحصل على جائزة الأوسكار في تاريخ الأكاديمية، وفى لحظة تكريمه وجه شكر ساخر للرئيس دونالد ترامب اللي بتوجه له أصابع الاتهام بالعنصرية والعداء ضد المسلمين والعرب.
أوسكار أفضل ممثلة مساعدة
فيولا ديفيس عن Fences
وكان فيه منافسة شديدة على اللقب بين بين النجمات: فيولا ديفيس عن فيلم «fences»، ناعومي هاريس عن فيلم «Moonlight»، نيكول كيدمان عن فيلم «lion»، وميشيل ويليامز عن فيلم « Manchester by the Sea»، و أوكتافيا سبنسر عن فيلم « Hidden Figures». لكن فيولا قدرت تحصد الجائزة في النهاية.
أوسكار أفضل مخرج
دميان شازيل عن La La Land
وطبعًا يعتبر ده فوز متوقع لمخرج واحد من أفضل الأفلام في 2016 وواحد من الأفلام اللي تصارعت علي الأوسكار حتي النهاية، فكان لازم مخرج الفيلم يحصل على جائزة أفضل مخرج.
أوسكار أفضل سيناريو أصلي
كينيث لونرجان عن Manchester by the Sea
وهي جائزة مستحقة فعلًا، على الرغم من أن الفيلم لم يحظ بالإهتمام اللائق في رأينا الشخصي، وكان يستحق تسليط الضوء عليه أكتر من كده.
أوسكار أفضل سيناريو مُقتبس
باري جينكينز وتاريل ألفين ماكريني عن Moonlight
وهي جائزة جديدة تضاف لجائزة أفضل فيلم بيحصدها فيلم (مون لايت) أيضًا.
أوسكار أفضل تصوير
لينوس ساندجرين عن La La Land
بعد الكادرات الساحرة اللي جعلت الجميع يشعر أنهم في حلم رائع مش مجرد فيلم، كان لازم الفيلم يحصد جائزة أفضل تصوير.
أوسكار أفضل موسيقى
La La Land
هل كان حد عنده شك في الجائزة دي؟ بنعتقد أن جائزة أوسكار أفضل موسيقى تصويرية كانت محسومة منذ لحظة إصدار الفيلم في السينمات الأمريكية والعالمية، وماكانش ناقص غير إعلان الجائزة علشان تبقى الأمور رسمية مش أكتر!
أوسكار أفضل أغنية
“City of Stars” من La La Land
وطبعًا جائزة أفضل أغنية هي كمان كانت محسومة للفيلم المحظوظ.
أوسكار أفضل مونتاج
جون جيلبرت عن Hacksaw Ridge
وهو واحد من الأفلام اللي تعرضت للظلم في 2016، وتم تذكره بجائزة أفضل مونتاج فقط. لكن في رأينا الفيلم ممتاز جدًا وكان يستحق إشادة وجوائز أكتر من كده.
أوسكار أفضل مونتاج صوت
Arrival
على الرغم من توقعات كتير من النقاد ان الفيلم يكون له نصيب أكبر من المنافسة، لكن في النهاية فاز بجائزة أوسكار أفضل مونتاج صوت فقط.
أوسكار أفضل مكساج صوت
Hacksaw Ridge
لازلنا عند رأينا أن الفيلم بيحصد جوائز في مناطق غير مؤثرة، على الرغم من استحقاقه للتنافس على فئات أهم وأقوي.
أوسكار أفضل مؤثرات بصرية
The Jungle Book
وقدر الفيلم يحصد الجائزة بعد صراع مع أسماء هامة زي Deepwater Horizon
Doctor Strange
Kubo and the Two Strings
Rogue One: A Star Wars Story
أوسكار أفضل إنتاج فني
La La Land
كالعادة لالا لاند بيحصد المزيد والمزيد من الجوائز!
أوسكار أفضل أزياء
Fantastic Beasts and Where to Find Them
الفيلم اللي بيرجعنا تاني لزمن هاري بوتر الجميل، واللي قدرت الأزياء فيه أنها تقدم الشخصيات والأبطال بشكل مختلف وجميل ومتميز.
أوسكار أفضل مكياج
Suicide Squad
وده طبعًا بسبب المكياج المتميز اللي ظهر به كل أبطال الفيلم تقريبًا، واللي يعتبر واحد من أهم أفلام الأبطال الخارقين اللي صدرت مؤخرًا.
أوسكار أفضل فيلم وثائقي
O.J.: Made in America
والفيلم بيحكي عن البطل الرياضي الأمريكي لاعب كرة القدم الأمريكية أو جاي سيمبسون اللي أدين في قضية قتل زوجته السابقة وصديقها، لكنه بيقدر يخرج من المحاكمة بالبراءة رغم ثقة الجميع في أنه القاتل الحقيقي، وإزاي بيلوم صناع الفيلم المجتمع الأمريكي نفسه ونظامه على صناعة مثل هذا البطل رغم حياة البلطجة والقتل والسرقة اللي عاشها.
أوسكار أفضل فيلم وثائقي قصير
The White Helmets
والفيلم بيحكي عن المجهودات الضخمة اللي بيقوم بيها فريق الدفاع المدني في مدينة حلب السورية، وقدر يقتنص الأوسكار نتيجة تركيز العالم على الصراع في سوريا كواحدة من أكتر بقاع العالم سخونة، لكن للأسف صناع الفيلم فشلوا في حضور الحفل وأستلام جوائزهم بسبب قرارات الحظر اللي أصدرها الرئيس دونالد ترامب، ومجلة تايم الأمريكية قالت إنه تم منع خالد الخطيب رئيس جماعة الخوذ البيضاء اللي بيتكلم عنها الفيلم من السفر للولايات المتحدة لحضور الحفل.
أوسكار أفضل فيلم قصير
Sing
وقدر الفيلم يحصد الجائزة بعد صراع مع أفلام زي
Ennemis Interieurs
La femme et le TGV
Silent Nights
Timecode
أوسكار أفضل فيلم رسوم متحركة
Zootopia
والحقيقة أننا بنعتبر فوز الفيلم غير منصف، وكنا نتمنى فوز فيلم moana أو kubo and the two strings على سبيل المثال، لكن ده لا يمنع أن فيلم zootopia هو كمان فيلم جيد.. لكن مش لدرجة الأوسكار!
أوسكار أفضل فيلم رسوم متحركة قصير
Piper
وتنافس على الجائزة أفلام:
Blind Vaysha
Borrowed Time
Pear Cider and Cigarettes
Pearl
أوسكار أفضل فيلم أجنبي
The Salesman
وهنا كانت مفاجأة كبيرة جديدة، وهى تصميم مخرج الفيلم الإيراني أصغر فرهادي على مقاطعة الحفل اعتراضًا على قرار الرئيس الأمريكي دونالد ترامب بمنع مواطنين بعض الدول من الدخول للولايات المتحدة.
وبكدة تنتهي حفلة أوسكار 2017.. بكل الأخطاء الكارثية اللي فيها، وبكل التعليقات السياسية المرحة والساخرة، وبكل لحظات الحب والدفء والاستعراض بالملابس والإكسسوارات وغيرها.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
