أوزيريس: مساحة جديدة للتدريب والعروض فى منطقة القصر العيني
Omar Mossad
"الفن مش حكر على حد".. أرض البراح اللي لا يحدها سور ولا يحجبها باب، وثمرها قريب من كل أيد ممدودة علشان تطول، ومهما كثر الناس فيها عمرها ما تبقى زحمة! وحتى اللي عمره في يوم ما كان ولا هـ يبقى فنان، ما يقدرش يعيش من غير ما يمارس فن، أو على الأقل يتأثر بفنون غيره وتتحرك نفسه لها، وذلك أضعف الإيمان!
أيام زمان كل ما نجيب سيرتها أو نستعرض اللي كان بـ يحصل فيها يبان لنا أد إيه إحنا كل ما الزمن بـ يتأخر بنا بـ نبعد عن الإنسانية وبـ نقرب تدريجيًا من مرحلة الإنسان الآلي المبرمج صاحب الروح الثقيلة، والمشاعر الجافة.
أيام زمان كان الناس يعرفوا ويفهموا أن الفن لابد يكون مكون أساسي من مكونات الحياة اليومية، علشان كده كانوا بـ يهتموا جدًا بإيجاد مساحات لممارسته باستمرار، وأماكن مناسبة لاستيعاب طاقات أرواحهم وتقلبات مزاجاتهم وتغيرات ظروفهم على اختلافها وتنوعها وتفاوتها، فـ تلاقي قصور الثقافة اللي كانت موجودة في كل مكان، وكمان النوادي الاجتماعية -بمفهومها الشامل- وغيرهم.
دلوقت الموضوع بقى -تقريبًا- مقتصر على المسارح والقاعات، ومنحصر في الحفلات والفعاليات العامة اللي –غالبًا- ما بـ يكونش متاح للجميع المشاركة فيها أو متابعتها، علشان كده بـ نفرح جدًا لما نلاقي حد قدر يوجد مساحة تقوم بالدور المفتقد اللي كانت بـ تقوم به الجهات اللي قلنا عليها زمان، وبـ نعتبر نفسنا لقينا "لقيّة"!
"أوزيريس.. للتدريب والعروض الفنية"
تسمية وظيفية غريبة علينا شويتين، بس ما علينا، كل ما في الأمر أن الناس القائمين على المكان ده عملوا مساحة تتيح الممارسة البسيطة والمستمرة للفن، سواء تدريب أو تعليم أو تجارب أداء أو حتى تثقيف عام، إزاي الكلام ده؟
المكان بمنتهى البساطة قائم على نشاطين أساسيين، ومعاهم شوية أنشطة فرعية، النشاط الأول: التدريب، وده لكل الناس البعيدة عن الممارسة وحابة تتعلم فن بسيط بـ تحبه، بـ يعملوا دورات تدريبية بمستويات مختلفة في كل أنواع الفنون: المسرح بمختلف أشكاله، والغناء بأنواعه، والآلات الموسيقية، والشعر.. و.. و.. وفي ختام كل دورة بـ يطلعوا بمنتج فني من المتدربين (عرض فني) يعرضوه بعد كده في المكان كفعالية من الفعاليات اللي بـ يقدمها للجمهور، وده النشاط الأساسي الثاني اللي هو: العروض الفنية، والعروض الفنية عندهم نوعين: إما عروض فنية لفرق أو مجموعات فنية قائمة بالفعل ومعروفة في الوسط الفني، كان أبرزها عرض لفرقة الشيخ "زين محمود" للغناء الصوفي، أو عروض للمجموعات اللي بـ تتدرب في الورش الفنية اللي عندهم زي ما قلنا.
أما عن بقية الأنشطة في المكان فـ نقدر نعدي منهم على كام حاجة كده، يعني مثلًا:
الندوات الفنية والتثقيفية العامة، ودي بـ تكون لقاءات مفتوحة مع ناس لها علاقة بالوسط الفني وأصحاب أعمال ناجحة فيه، بـ يطرحوا فيها قضية معينة أو بـ يناقشوا عمل معين من أعمال صاحب الندوة أو حتى يخلوها دردشة فنية مفتوحة، كانت آخر الفعاليات اللي من النوع ده لقاء مفتوح مع السيناريست "مريم ناعوم" اللي كان آخر أعمالها الفنية كتابة سيناريو مسلسل "تحت السيطرة" اللي تم عرضه فى رمضان الماضى.
ومن الأنشطة دي كمان: إتاحة قاعات المكان للتدريب والبروفات للفرق والمجموعات الفنية المختلفة بنظام تأجير بالساعة، الساعة بـ تكون بـ 20 جنيه في القاعات الكبيرة و15 في القاعة الأصغر، ودي أرقام كويسة جدًا بالنسبة للموجود في الوسط، وحجز القاعات بـ يكون تليفونيًا على رقمهم 01067363433.
ويعني.. بما أن الفن أرضه واسعة زي ما قلنا فطبيعي أنه تكون أنشطتهم منوعة جدًا، وبالتالي هـ يكون صعب نقعد نسرد فيها بشكل مفصل، علشان كده قسمناهم لدوائر وجمعناهم تحت عناوين عريضة تشمل تحتها أنشطة كثير.
لو عاوز تعرف عنوان وتليفون المكان اضغط هنا، وتقدر تتابع دنيتهم أول بأول وتعرف فعالياتهم الجاية أو اللي اتعملت قبل كده وتتواصل معاهم من خلال صفحتهم على الفيسبوك.
وعلى رأي أوزيريس "آرت إز جود فور يو"!
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
