The Definitive Guide to Living in the Capital , Cairo , Egypt

في الفترة الأخيرة، ظهرت بوستات كتيرة جدًا بتتكلم عن نقل مكان معرض الكتاب المعروف في أرض المعارض في مدينة نصر، واللي بقاله أكتر من 20 سنة، لمكان جديد، وطبعًا وجهات النظر اختلفت ما بين مؤيد ومعارض للفكرة.

وبالمناسبة دي، الصفحة الرسمية لمعرض القاهرة الدولي للكتاب على الفيس بوك، كتبت بوست طويل بتشرح فيه أسباب نقل المعرض لمكانه الجديد في التجمع الخامس، و جاوبت تقريبًا على كل الأسئلة اللي ممكن تخطر على بالنا.

الصفحة قالت في بداية البوست إن المعرض مش أول مرة يتنقل لمكان جديد، زمان كان المعرض بيكون في الأوبرا من سنة 1969، ولما اتنقل لمدينة نصر سنة 1984 اتهاجم نفس الهجوم ده، ويمكن أكتر، وبعد كده الناس فهمت انه النقل للأفضل، وبعد مرور كل السنين دي، أرض المعارض في مدينة نصر بقت متهالكة بشكل كبير، فكان الطبيعى إن المعرض يتنقل لمكان أفضل، ومكنش فى مناسبة أفضل من اليوبيل الذهبى للمعرض، علشان يشهد على التطور الكبير ده.

طيب ليه ما تتصلحش أرض المعارض ونبني مبانى جديدة تستوعب المتغيرات الجديدة دي؟ وخاصة كمان إن المعرض في الفترات الأخيرة كان فيه سوء خدمات ونظافة وتنظيم، وكتير من الناشرين اتعرضت كتبه للتلف من مياه الأمطار، نتيجة إقامته فى خيام ، ده غير إن شكل المعرض أصلًا لايليق بالمعرض الأول جماهيريًا على مستوى العالم.

إدارة المعرض قالت في ردها إن “هيئة الكتاب” مش بتقوم ببناء مبانى أو إنشاءات، لكن بتأجر أرض المعرض والمباني خلال فترة المعرض بس، وكل اللي بتعمله الهيئة هو الديكورات الخاصة بالمعرض، وتسكين الناشرين، والاشراف على البرنامج الثقافى، والمكان الجديد مجهز للعمل بكفاءة، وبيتعمل فيه معارض طول السنة.

طيب السؤال الملح دلوقتي.. إيه هي مميزات المكان الجديد ؟ بص يا سيدي، المكان مجهز بأحدث التقنيات العالمية فى مجال الصناعات الثقافية وتسويق الكتاب، ده غير التنظيم والخدمات المتميزة اللي بتخص الجمهور بشكل عام.

نقطة تانيه وهي بتخص الناشرين أو العارضين، وهي إن تقريبًا كل مشاكلهم هتتحل، سواء المتعلقة بالتنظيم والعرض، أو المتعلقة بالتأمين والحماية من عوامل الجو. 

كمان المشاركة الدولية هتكون متميزة السنة دي على حسب كلام إدارة المعرض، وفي عدد كبير من دول العالم هتشارك بأجنحة كبيرة في المعرض، وعلشان كده كان لازم يتنقل لمكان أكبر ويليق بالحدث العالمي ده.

وعلى عهدة إدارة المعرض إن هيكون في خصومات كبيرة بمناسبة اليوبيل الذهبي للمعرض، ده غير اماكن انتظار السيارات بمساحات كبيرة ودي كانت أزمة مش سهلة خالص على الناس اللي بتروح.

طبعًا الناس اللي ما عندهاش مشكلة في الكلام اللي فوق ده خالص، بس مشكلتها الرئيسية ويمكن الوحيدة هي هنروح ازاي؟؟ خد عندك يا سيدي المفاجأة دي، الهيئة المصرية العامة للكتاب أعلنت انه هيتم توفير مواصلات من كل الميادين الرئيسية في القاهرة لمكان المعرض الجديد وهتنشر خريطة كاملة لده قريب.

طيب منعتوا سور الأزبكية ليه؟  ده كان سؤال مهم ومطروح على صفحة المعرض، و اللي بدورها الهيئة العامة للكتاب مشكورة ردت عليه وقالت انها ما اتعمدتش منع سور الأزبكية، ولكنها نفذت قرارات اتحاد الناشرين المصريين والعرب بعدم مشاركة أى بائع بيعرض وبيبيع كتب مزورة، وده لحماية حقوق الملكية الفكرية، وبديلًا لده قامت الهيئة بخطوتين مهمين : 

أولاً: هيتعمل جناح كبير للكتب المخفضة تابع لهيئة الكتاب، هتبدأ أسعاره من جنيه واحد.

ثانيًا: هيتعمل خصومات ماحصلتش قبل كده في دور النشر المختلفة على الكتب الأصلية اللي هيطلبها الجمهور.