The Definitive Guide to Living in the Capital , Cairo , Egypt

من 6 سنين فيه مجموعة شباب قرروا أنهم يعملوا مهرجان للأطفال في محافظة أسوان، وهو مهرجان هدفه نشر قيم الفن والثقافة، والسنة دي مهرجان آرت نارتي اللي بدأ بإمكانيات محدودة، بينطلق في دورته السادسة بمشاركة مجموعة من المشاهير في الفن والثقافة وغيرهم، وأصبحت فعالياته موجودة في 3 محافظات في الصعيد، وكمان هيضم أطفال أهل السودان النازحين من الحرب. خلال السطور الجاية هنعرفكم كل حاجة عن مهرجان آرت نارتي.

بتقول المهندسة ضحى مصطفى لفريق كايرو 360، وهي واحدة من مؤسسي المهرجان، إن مهرجان آرت نارتي بدأ يوم 12 مايو في محافظة المنيا، وضم 250 طفل، وانتقل بعد كده لمحافظة قنا، وشارك في المهرجان 300 طفل، ومن يوم 15 مايو حتى 25 مايو هيتم استكمال باقي فعاليات المهرجان في منطقة غرب سهيل في محافظة أسوان بمشاركة 1800 طفل وبيهدف المهرجان لمشاركة جميع الأطفال دون تمييز.

المهرجان السنة دي بيقدم مجموعة ورش مختلفة ومهمة للأطفال يوميًا بهدف تعليمهم وأنهم ينتجوا اللي بيحبوه ويقدروا يتميزوا فيه في الحرف والفنون المختلفة زي الرسم والتصوير والنحت والخزف، والكتابة والحكي والقصة والتعليق الصوتي، وورش تكنولوجية، وورش اكسسوارات وخشب وخياطة، وفي نهاية المهرجان هيكون فيه عرض أزياء ومسرحية وعروض غناء ورقص، وكمان معرض فنون تشكيلية.

ضحى وضحت أن السنة دي المهرجان شعاره “أبناء النيل” وهو موجه لكل دول حوض النيل، لتعريف الأطفال أن نهر النيل هو شريان الحياة في مصر، وأنه بيجمعنا مع اخواتنا في وادي النيل، وبيوصل رسالة عن معاني التكامل والوحدة وقبول الاختلاف والآخر.

المهرجان هيضم أكاديميين متخصصين كلًا في مجاله ومنهم اللي بييجوا من بره مصر مخصوص للمشاركة، والسنة دي اتفتح باب التطوع والجميل أن اللي شارك في أول مهرجان اللي اتعمل في 2017 وكان سنه 7 سنين، السنة دي وهو عنده 13 سنة بيشارك كمتطوع في تنظيم المهرجان ودي بينمي جواهم المشاركة المجتمعية ومساعدة الغير، وده بخلاف المتطوعين الشباب وبعض كبار السن، وده هدفه تسليم الأجيال والاستمرارية والتواصل بين الأجيال.

المهرجان متاح لكل الأطفال اللي موجودين في أسوان الفترة دي، وحتى لو متواجدين لمدة يوم واحد وبدون أي شروط، وكمان المهرجان بيقدم دعوة لكل الناس للحضور مع أطفالها والمشاركة في فعاليات المهرجان واللي في نهايته هيقدر الأطفال المشاركين أنهم يشاركوا في معرض لبيع منتجاتهم اللي نفذوها خلال فترة المهرجان وكمان هياخدوا نسبة من الربح في صورة أدوات وخامات لتطوير مهاراتهم بأنهم ينفذوا منتجات تانية سواء اكسسوار أو خشب أو لوحات فنية.

مهرجان آرت نارتي بيضم السنة دي فوق الـ2000 طفل، بيشاركوا في كل الورش اللي بيتم تنظيمها بمشاركة المتطوعين والمتخصصين، ومنهم بسنت نور الدين في مجال السياحة، سحر جبر، السيد إبراهيم في مجال الكتابة للأطفال، نشوى الحناوي، نشوى عطا، خلود كمال، في مجال الفنون التشكيلية، ومنة حمزة في مجال تصميم الإكسسوار والحلي، نهى ودينا بحر في مجال الأفلام القصيرة، وفاء فايد في مجال تصميم الملابس المصرية والأفريقية.

وعلشان تعرفوا أكتر عن المهرجان وتفاصيله زوروا صفحتهم على فيسبوك من هنا.