8 حاجات لو عملتهم مش هتروح للدكتور

صحة ولياقة

01/02/2018

8 حاجات لو عملتهم مش هتروح للدكتور

بواسطة

Omar Mossad

كل شوية جسمنا بيتعب وبنحتاج نروح لدكتور ونلاقي السبب في النهاية إننا بندخل جسمنا سموم بدل الحاجات اللي محتاجها وإننا محتاجين نفهم يعني إيه حياة صحية؟
بنستسهل غالبًا أو فاكرين الموضوع مش بالأهمية الكافية. لأ يا سيدي، الحياة الصحية مش بس نظام أكل، ومش كلها متعلقة بالأكل القليل، هي متعلقة بسلوكك العام (اللي متضمن الاعتدال في الأكل أكيد)، أنت عايش إزاي؟ إيه الأنشطة اللي بتتم في حياتكم متوزعة على وقتك إزاي؟ وبتمارسها بأنهي شكل وأسلوب؟ الإجابات على الأسئلة دي هتحدد بشكل كبير الصورة اللي المفروض تقرب منها والنصايح اللي المفروض تسمعها.. لكن بما أنه إحنا محدودين بمساحة مش هتسمح بأننا نكتب روشتة أو كتالوج نصايح لكل فئة بشكل منفصل، وبرضه بما أن حياتنا زحمة كفاية للدرجة اللي تخلينا مانعرفش نركز ونتابع.. فخلونا نقول مجموعة نصايح عامة صالحة لكل الفئات وماتكلفناش وقت ومجهود وتركيز كبير.. علشان الموضوع يبقى أسهل وأوقع.

النوم

أكتر حاجة (وفي الغالب بتكون أصعب حاجة خصوصًا للناس اللي متعودين على نظام حياة معين ومش بيقدروا يغيروه بسهولة) ممكن تخلي حياتك صحية هي ظبط مواعيد يومك والتحكم في أوقات نشاطاتك خلاله.. لأنه ببساطة العادات الصحية عمرها ما هتتكون غير لما تخليها مخلوطة بيومك وبحياتك، فتبقى بتعمل كل حاجة بشكلها المناسب في معاهدها المناسب.. ومافيش حاجة هتساعدك على كده خالص قد تظبيط مواعيد نومك وأخد كفايتك منه، السهر ده أحد أسوأ اختراعات البشرية لأنه -بعيدًا عن أضراره المعروفة- كمان مش بيسمح لك أنك تبقى مالك ترتيب أنشطتك في الأوقات اللي بتختارها، فهتلاقيك بتاكل في أوقات غلط وبتعمل حاجات في وقت مش مناسب ليها فالدنيا بتبوظ خالص.. فلو عرفت تضغط على نفسك حبة في ظبط مواعيد نومك (بدري وصحيان بدري) وحافظت على ده لمدة أسبوع وفعلًا هتبدأ تتعود على ده مع الوقت.. وده هيفرق معاك جدًا في أن يومك يبقى بتاعك، وتبقى بتعمل كل حاجة في وقتها الصح بتاعها لأنك أنت اللي مختار مش مجبر على حاجة ولا النشاطات هي اللي بتسلمك لبعضها من غير إرادتك.

الأكل

كلنا بنبقى فاكرين أن الموضوع في الأكل متعلق بالكمية وبس. فناكل قليل يبقى إحنا كده تمام، بس في الواقع الدنيا مش كده خالص. المسألة مش مسألة “تقليل”، المسألة مسألة “اعتدال”، غير أن الكمية مش هي العامل الوحيد.. زي ما الكمية بتفرق فكمان نوعية الأكل وطبيعته بتفرق، ومواعيده برضه بتفرق جدًا. فعلشان تبقى بتاكل أكل صحيح مش كفاية أبدًا أنك تراعي الكمية، محتاج كمان تراعي أنك تبقى موزع وجباتك على اليوم صح، وأنك ما تاكلش أكل تقيل وصعب الحرق في وجبة العشاء، وأنك عمومًا تبعد عن الأكل اللي بيسبب مشاكل على المدى القريب (عسر الهضم مثلًا) أو على المدى البعيد (السمنة مثلًا).

الشرب

الأكل مش الحاجة الوحيدة اللي ممكن تملى فراغ المعدة، المياه كمان شريك أساسي ولازم يبقى واخد وضعه وتقديره اللي يستحقه مننا.. شرب المياه الكثير بيفرق جدًا في نضارة الجلد وتجنب مشاكل الهضم ومشاكل تراكم الأملاح وكمان بيساعد على التخفف من الدهون.

تقليل استخدام السكر

السكر عدوك الأول.. قلل الاستخدام تدريجيًا وصدقني الموضوع أبسط مما أنت متخيله، وهيفرق معاك جدًا. في ناس كانت مابتقدرش تدوق كوباية الشاي غير لو نصها سكر، ودلوقتي وصلوا لمرحلة أنهم بيكتفوا بمعلقة واحدة أو نص معلقة، وأحيانًا من غير سكر خالص.. جرب تقلل واحدة واحدة والموضوع سهل وهيفرق معاك جدًا.

ركز

جسمك ده أنت.. مكمل معاك للآخر ومافيش استبدال ولا قطع غيار.. ماينفعش يبقى وكالة من غير بواب، أي حاجة تدخله في أي وقت من غير لا رقيب ولا حسيب.. ده كلام ماينفعش خالص ولا يصح حضرتك، خد بالك أن دي صحتك.. وركز إيه يدخل جسمك وإيه لأ.

النشاط

أي نشاط بدني ولو خفيف مهم جدًا لتنشيط العمليات الحيوية جوة جسمك، ده غير أنه بيفرق في جمال شكله طبعًا.. الشوية اللي هتتمشاهم مثلًا دول مش خسارة في صحتك.