Cairo 360
في كتير من الوقات، بنكون داخلين على مغامرة جديدة زي شغل، أو مشروع، أو حاجة في حياتنا هنعملها لأول مرة. بس خايفين من الفشل. صحيح ده إحساس طبيعي، لكن لو خليناه يتغلب علينا هنفشل بالفعل. وفي السطور اللي جاية هنقول لكم على أهم النصائح النفسية اللي هتساعدكم على النجاح. حسب ما ذكرها موقع “psychologytoday”:
1- إعادة تعريف الفشل
لازم الشخص يقف مع نفسه ويحدد إيه معنى الفشل بالنسبة له. ليه ماقدرش يحقق إللي هو عايزه؟ وكمان لازم يعرف الفرق بين اللي عاوز يحققه، واللي حققه بالفعل. ده هيساعده في ترتيب أولوياته، وتنفيذ مشروعه بدقة.
2- التمييز بين التهديدات الحقيقية والخيالية
في تهديدات حقيقية على أرض الواقع، ممكن تأثر على نجاحك. لكن فيه تهديدات تانية من وحي خيالك بس. بتكون مجرد وهم انت بتحطه قدامك، بيعطلك ويأخرك. لازم تعرف الفرق بينهم علشان تقدر توصل للي أنت عاوزه.
3- تحديد الأهداف
ضروري جدًا إن الشخص يحدد أهدافه، والخطوات اللي هيمشي عليها علشان يحققها. وكمان لازم يحط خطة لفشل أي خطوة منهم.
4- توقع تحقيق نتائج إيجابية
توقعك لنتائج إيجابية هيديك دعم نفسي قوي علشان تحقق أهدافك. بس لازم تستغل ده في تركيزك على وقت تحقيق الأهداف، وهل ماشي بخطوات سليمة؟ ولا محتاج تعدل حاجة؟ ضروري تراجع كل التفاصيل باستمرار.
5- اعرف إنك قوي وتقدر تكمل
جزء من تحقيق الأهداف بيتعلق بإيمان الشخص بنفسه. وإنه يكون عارف إنه يقدر يحقق الأهداف دي. علشان كده لازم يتخلص من كل المشاعر السلبية. ويتأكد تمامًا إنه يقدر المشوار لآخره.
