منها التوقف تمامًا عن التدخين.. 5 نصائح مهمة للمتعافين من “كورونا” حديثًا
الإجراءات الاحترازية كورونا المستجد كوفيد-19 نصائح الوقاية من فيروس كورنا نصائح بعد التعافي من كورونا
Mohamed Talaat
الفترة دي فيروس كورونا المستجد (كوفيد 19) أصبح أقرب لنا من أي وقت فات، خصوصًا لو كنا بننزل كل يوم لشغلنا وبنستخدم وسائل المواصلات العادية، لكن من الحاجات الإيجابية إن العلاج من “كورونا” أصبح حاجة ممكنة مع توفر الأدوية، ومع توفر الخبرة اللازمة عند كتير من الأطباء المصريين حاليًا.
لكن نعمل إيه لو كنا تعرضنا للإصابة –لا قدر الله- بـ “كورونا” مؤخرًا، ونجحنا في التغلب على الفيروس واتعالجنا منه؟ وهل ده معناه إننا بقينا في أمان ومش مفروض نخاف من تكرار الإصابة؟ الحقيقة إن أكبر خطأ ممكن نقوم به هو عدم الالتزام بالإجراءات الاحترازية بعد الأسبوع الأول من التعافي ومغادرة المستشفى أو الخروج من العزل المنزلي بعد العلاج، وبحسب مواقع طبية متخصصة فيه نصائح مهمة هتساعدكم على حماية نفسكم وتجنب المضاعفات، تعالوا نعرفها مع بعض:
التزموا بجميع الإجراءات الاحترازية
رجوع العدوى مرة تانية أمر ممكن الحدوث للمتعافين من فيروس “كورونا”، حتى بعد اختبارهم سلبيًا للفيروس، علشان كدة من المهم الاستمرار في الالتزام بجميع الإجراءات الاحترازية، زي التباعد الاجتماعي وارتداء أقنعة الوجه واستخدام معقمات اليدين.
اهتموا بالتغذية السليمة
بعد التعافي من أي مرض، لازم تهتموا بالتغذية، ونفس الأمر مع “كورونا”، لازم بعد التعافي تمشوا على نظام غذائي صحي، واشربوا مياه بشكل مستمر، ده هيساعدك على التعافي بشكل أسرع.
تجنبوا التدخين
في كل الحالات، سواء كنتم متعافين من “كورونا” أو لأ، لازم تتجنبوا التدخين تمامًا، لأن الفيروس ده بيهاجم الرئتين.
ابعدوا عن المناطق الملوثة
تلوث الهواء بشكل عام بيؤثر على التنفس، وده معناه إنه خطر على الرئتين وصحتكم العامة، وعلشان كدة حاولوا الابتعاد عن الأماكن الملوثة بعد التعافي من “كورونا” لأنها ممكن تؤدي لحدوث مضاعفات.
العبوا رياضة
بعد التعافي من “كورونا”، لازم تمشوا على نمط حياة صحي كله نشاط، والعبوا رياضة، واتمشوا كتير، لإن الكسل أمر خطير وممكن يؤدي لمضاعفات.
