مع “مادو” و”راميش” تأمل علشان تكون أعلى من مشاكلك
Heba Hasab
ناس
كثير فاهمة أن التأمل المفروض يحل لك المشاكل اللى فى حياتك، لكن الحقيقة مش كده..
التأمل مش بـ يغير المشاكل، لكن بـ يغيرك أنت وبـ يعلمك تبقى أقوى من المشاكل
وأقدر على حلها.
التأمل
من خلال التركيز على التنفس وملاحظته وعدم التفكير فى أى فكرة تخطر على بالك سواء
إيجابية أو سلبية بـ يساعد عقلك على التخلص من التفكير فى السلبيات والمشكلات
المسيطرة عليه طوال الوقت.. تخيل عقلك ده لاعب كرة بـ يلعب طول الليل والنهار
وعمره ما خرج من الملعب، أكيد أداؤه هـ يفضل يقل ومستواه ينخفض، تخيل بقى لو خرجنا
اللاعب ده من الملعب كل يوم فترة يرتاح فيها، كده لما ينزل الملعب ثانى هـ يؤدى
بشكل أفضل ويحقق نتائج أعلى.. وهو ده التأمل.
حسب
كلام “راميش” أو “رام” مدرب التأمل الهندى: عقل الإنسان شبه
الكوباية؛ مش هـ نقدر نحط جواها أى حاجة زيادة إلا لما نفضى اللى موجود الأول علشان
نخلق فيها مساحة تستوعب المحتوى الجديد، وهو ده هدف التأمل اللى بـ تقدمه “مادو”
وزوجها “رام” فى الدورات اللى في بيتهم بشكل يومى من الساعة 7:30 لـ
9:30 مساء، وفى حديقة الأزهر كل يوم سبت 9:30 صباحًا، وكل يوم جمعة فى ساقية
الصاوى فى الزمالك 9 صباحًا، وللأطفال والمدرسين فى أحد المدارس الكبيرة فى مصر، والغريب
في كورس المدارس ده أن سن الأطفال اللى بـ يمارسوا التأمل بـ يتراوح من 4: 15 سنة،
وحسب كلام مادو الأطفال مستجيبين وملتزمين بشكل كبير جدًا للتمرين وبـ يؤدوا كل
يوم بشكل أفضل من اليوم اللى قبله.
مادو
ورام عايشين فى مصر من 3 سنين تبعًا لظروف شغل رام كمهندس فى شركة من شركات
الأسمنت الكبيرة فى مصر، وبـ يقدموا كل دورات التأمل فى كل الأماكن اللى ذكرناها
بدون أى مقابل، وبـ يقولوا أنهم بـ يعملوا ده علشان ينشروا ثقافة التأمل ويعرفوا
الناس على فوائده من ناحية وعلشان يشوفوا الابتسامة والراحة على أوجه الناس
المنضمين للكورس بعد أثر التأمل والهدوء ما يظهر عليهم وهو ده فقط الأجر اللى هما
منتظرينه من الكورس.. “رام” بـ يمارس النوع ده من التأمل “التركيز
على التنفس” من 10 سنين و”مادو” بـ تمارسه من سنتين.
أحد
المنضمين للكورس بـ يقول أنه كان بـ يصاب دائمًا بحالة تشنج وألم فى ذراعه كل ما
يتضايق من حاجة أو تقابله مشكلة ولما بدأ التأمل من 7 شهور بدأت الحالة دى تقل
عنده لحد ما اختفيت نهائيًا، وشخص آخر بـ يقول أنه قبل ما يبدأ يمارس التأمل كان بـ
ينام حوالى 10 ساعات فى اليوم وبـ يحس دائمًا بالإرهاق وعدم التركيز وبعد التأمل
بقى بـ يكتفى بنوم 4 أو 5 ساعات وبـ يصحى في منتهى النشاط والتركيز وده سببه أن
التأمل بـ يصفى الذهن أكثر من النوم لأن حتى أثناء النوم العقل بـ يفكر برضه بس من
خلال اللاوعى.
ممكن
لأى حد أنه يمارس التأمل في البيت ومش لازم ينزل يروح مكان معين أو ينضم لكورس لو
كانت ظروفه لا تسمح.. مجرد أنك تقعد لوحدك وتغمض عينيك وتقفل موبايلاتك وتهدى
النور وتركز على نَفَسَك تبقى كده بـ تتأمل، وعلشان أنت مبتدئ ممكن تبدأ بـ 15
دقيقة فى اليوم لحد ما تتعود لكن الطبيعى أنك بـ تتأمل عدد سنين عمرك دقائق، يعنى
لو عندك 20 سنة تأمل 20 دقيقة، ولو 30 سنة تتأمل 30 دقيقة وهكذا.
علشان
تنضم لمادو ورام فى أى مكان من أماكن الكورسات اللى قلنا عليها ممكن تتصل بهم على
رقم: 01093548720
