The Definitive Guide to Living in the Capital , Cairo , Egypt

لو فيه حاجة واحدة موجودة عند كل الستات، أكيد هـ تبقى
تجربة الخروج من الكوافير بقصة شعر بايظة وإحساس الكآبة من كوافير إيده بـ تأكله
على القص. القاهرة فيها كوافيرات كثيرة جدًا، لكن أنك تلاقي كوافير مناسب هي دي
النقطة الصعبة. صعبة لأنك لازم تجربي واحد الأول علشان تقدري تحددي هو كويس ولا
لأ، وده ممكن يتسبب بعد كده في حالة ثانية من الكآبة بعد قصة شعر مش حلوة ثاني.
وهو ده بالضبط السبب اللي إحنا في كايرو 360 موجودين علشانه، علشان نجرب ونفرق لكم
بين الكويس، والوحش، والسيء.

«مانجو – Mango» موجود في الزمالك في شارع محمد مظهر، أمام محل «كووك دور». أصحاب
المحل كانوا فاتحين قبل كده في شارع ابن النبيه، وكان اسمه ساعتها «لا ميا فيتا».
لكنهم لمّا نقلوا غيروا الاسم كمان. المكان مش كبير، وفيه كرسيين لغسل الشعر،
وأربع كراسي لتصفيف الشعر في الدور الأرضي. الدور اللي فوق فيه غرف للماسكات
والماكياج. العاملين هناك اثنين: خالد (مصفف شعر)، وفادي (مصفف شعر وخبير تجميل)،
وكام بنت بـ يعملوا الباديكير والمانيكير والفتلة.

خالد مش مجرد كوافير، لكنه كمان بـ يعرف يعمل فورمات حلوة
جدًا ويعرف كويس إيه اللي بـ يليق. يقدر يحول شعرك المجعد لتسريحة مبهرة في دقائق
قليلة. قصات شعره سريعة جدًا لكن مضبوطة جدًا. أحسن حاجة فيه أنه بـ يعرف كويس
إزاي يتعامل مع الشعر القصير، على عكس أغلب الكوافيرات في مصر اللي بـ يتقنوا
التعامل مع الشعر الطويل فقط. قصة الشعر بـ يتكلف 100 جنيه شاملة السيشوار
وتسريحه. أو ممكن تعملي السيشوار والمكواة بـ 50 جنيه. أغلب المنتجات المستخدمة في
الكوافير من ماركة L’Oreal.

غير قصة الشعر الممتازة والسيشوار، إحنا جربنا الباديكير،
اللي كان كويس وسريع، لكن لو ركزوا زيادة على إزالة الجلد الميت اللي في الرجل كان
هـ يبقى أحسن. المانيكير كمان كان معمول بنظافة. جربنا برضه فتلة الحواجب (25
جنيه) وكانت رسمتها مظبوطة. المانيكير والباديكير بـ يكلفوا 30 جنيه.

سعر الماكياج بـ يفرق على حسب إيه نوع الماكياج اللي
عايزاه، والماركات المستخدمة هي MAC، Chanel، وLancome رغم أن فيه كوافيرات ثانيين ممكن يبقى عندهم محلات أكبر أو أفخم،
لكن في الآخر اللي بـ يفرق هو ملمس ومنظر شعرك. جربي «مانجو» ومش هـ يخيب ظنك أبدًا.