The Definitive Guide to Living in the Capital , Cairo , Egypt

كتير من المصريين بيحبوا العرقسوس، لكن ما نقدرش ننكر إنه في المقابل فيه كتير مش بيستلطفوه، ودايمًا بنشوف في رمضان حرب بين محبي وكارهي العرقسوس، لكن دايمًا الحرب دي بتنتهي بأن المشروب الرمضاني بيفضل صامد ومكمل معانا زي ما هو، وكل سنة يخرج من الحرب بدون خسائر ويفضل موجود على مائدة الإفطار.

لكن هل فكرتم إيه هي فوائد وأضرار العرقسوس؟ تعالوا نعرف مع بعض.

الدكتور بهاء ناجي، استشاري الأغذية، قال في تصريحات صحفية، إن العرقسوس له فوائد كتير، منها أنه فيه كمية من المعادن اللي بتساعد على علاج أمراض الكبد، وبيقضى على البكتيريا لأنه مشروب طعمه “لاذع”، وكمان هو مضاد للأكسدة، وده معناه أنه مفيد للجلد والبشرة، وبيمنحهم التفتيح والنقاء والصفاء، كمان بيعتبر العرقسوس مطهر للكلى لأنه مدر للبول.

العرقسوس كمان مرطب للجسم لأن فيه مجموعة مهمة من الزيوت، وهو مساعد في عملية الهضم، بشرط تشربوه بعد الأكل بدقائق، وكمان مفيد للثة لأنه فيه مضادات أكسدة.

لكن استنوا! على الرغم من كل الفوائد الموجودة في مشروب العرقسوس.. إلا إن كتر تناوله مضر بالإنسان، زي أنه ممكن يعمل اضطرابات لمرضى السكر لأن نسبة السكريات فيه عالية، وممكن يرفع ضغط الدم، وده مضر لأصحاب ضغط الدم المرتفع، كمان كتر شربه بيعمل مشاكل في القلب، وبيسبب الصداع وبيأثر على خلايا المخ في بعض الأشخاص.

وبحسب مواقع طبية متخصصة، فيه تحذيرات لازم ناخد بالنا منها عند تناول العرقسوس، مثلًا ممنوع تناول المشروب ده للسيدات الحوامل، لأنه هيتسبب في الولادة قبل الميعاد، كمان السيدات اللي بيرضعوا أطفالهم رضاعة طبيعية ممنوع يشربوا العرقسوس، والمشروب ممنوع كمان لمرضى القلب لأنه بيخزن المياه وده ممكن يأدي لفشل القلب وعدم انتظام ضرباته.

وبيحتوي العرقسوس على هرمونات بتوازي هرمون الإستروجين المسبب لأمراض سرطان “الرحم، المبيض، والثدي”، علشان كده ممنوع تناوله لأي إنسانة بتحمل الهرمونات دي، وكمان من أضرار العرقسوس أنه بيسبب التوتر الزائد لأنه بيخفض مستوى البوتاسيوم في الدم، والأطباء قالوا أنه ممنوع نهائي على مريض الكلى أنه يشرب العرقسوس لأنه هيسبب مخاطر كتير خاصة أنه بيعمل ترسبات.