The Definitive Guide to Living in the Capital , Cairo , Egypt

فيروس كورونا لسه عايش معانا ولكن مخاطره بقت قليلة، وكل فترة بيطلع متحور جديد منه بيعمل شوية قلق، والمرة دي ظهر رسميًا متحور جديد بيحمل اسم “EG.5” واللي اتسجل أول حالة بيه في فبراير 2023، ورغم تحذير منظمة الصحة العالمية منه على أنه وباء ولكن وصفته بأنه مش شديد الخطورة. في الموضوع ده هنقول لكم على أهم المعلومات عن المتحور، وكمان أعراضه.

متحور “EG.5” بيطلق عليه اسم غير رسمي وهو “إيريس”، وحاليًا انتشر في أكثر من 50 دولة حول العالم منهم مصر اللي أعلنت رسميًا عن إصابتين لمواطنين مش راجعين من بره.

ووصفت منظمة الصحة العالمية المتحور بأنه لازم يتراقب بسبب الطفرة في تكوينه اللي ممكن تخليه أكثر عدوى، ولكنه مش هيكون تهديد للصحة بشكل كبير.

حتى الآن، وطبقًا لمنظمة الصحة العالمية أصيب بالمتحور الجديد أكثر من مليون شخص توفى منهم 3100 حالة فقط، ورغم أن منظمة الصحة العالمية مأكدتش على أي خطورة منه إلا أن فيه تقارير أمريكية بتقول أنه خطر كبير على كبار السن وأصحاب الأمراض المزمنة والمناعية.

ومنظمة الصحة العالمية قالت في تقارير سابقة أن متحور “EG.5” أكتشف في الصين في فبراير 2023، ويطلق عليه إعلاميًا “إيريس”، وصنفته على أنه مثير للاهتمام ولكن ليس خطرًا بشكل أكبر مما سبق من المتحورات، ولكنه سريع الانتشار، وأعراضه بسيطة وبتصيب الجهاز التنفسي العلوي.

وبيقول مركز المعلومات ودعم اتخاذ القرار المصري إن أعراض “إيريس” بتتمثل في: “الحمى – التهاب الحلق – سيلان الأنف – السعال – خمول – إسهال – آلام الجسم والعضلات – انخفاض نسبة الأكسجين في حالة الإصابة الشديدة”.

ووضح مركز المعلومات أن أهم طرق الوقاية الحفاظ على أخذ تطعيمات كورونا وارتداء الكمامة.