Mohamed Talaat
الدولة بكل أجهزتها بتبذل مجهود جبار في محاربة فيروس كورونا المستجد، وعلشان تطمنوا على نفسكم، هنقول لكم في السطور الجاية إيه الحالة اللي لازم تعملوا فيها فحص فيروس “كورونا”.
أولًا أنتم مش محتاجين تقلقوا لكن لازم تحصنوا نفسكم، ولو أنتم اتعاملتم مع أشخاص ظاهرة عليهم أعراض المرض، أو حسيتم بأعراض زي الحمى والكحة الجافة أو ضيق التنفس، في الحالة دي بس أنتم محتاجين تعرضوا نفسكم على طبيب فورًا، لأن حتى لو الأعراض دي مشابهة لنزلة البرد العادية، ولكن الإطمئنان مهم جدًا، وكل ما كشفتم أسرع كل ما فرصة العلاج السريع هتكون أوفر وأحسن.
والطبيب بدوره لو حس إنكم لازم تعملوا فحص كورونا هيطلب منكم تروحوا مستشفى الحميات، سواء في إمبابة، أو العباسية.
وحسب الموقع العلمي “سيانس ألايرت” فأي حد بيشتغل في المنشآت الطبية لازم يعمل فحص فيروس “كورونا”، وخصوصًا اللي بيكونوا على اتصال مباشر مع مصابين، خاصة لو كانوا في “الحجر الصحي”.، وكمان اللي عمرهم أكتر من 65 سنة، وعندهم مشاكل صحية زي أمراض القلب والرئة والسكري، لازم يعملوا فحص كورونا.
وفي حالة كبار السن لازم تخلوا بالكم أن ممكن مايظهرش عليهم أعراض أصلًا، وده اللي حصل في الولايات المتحدة، وأغلبية كبار السن هناك كانوا حاملين للمرض بدون أي أعراض.
فحص كورونا سهل وبسيط، وهو انه بيتاخد عينة من تجويف الأنف، ومن خلالها بيتعرف الإنسان مصاب بالفيروس ولا لأ، وبياخد حد أقصى 72 ساعة علشان النتيجة تظهر، وخلينا ماننساش أن الوقاية خير من العلاج، ولازم الالتزام بتعليمات وزارة الصحة ومنظمة الصحة العالمية.
مقترح
فن وثقافة
طبلة الست.. فرقة غنائية بتنشر الفرح وتحيي التراث
حفلات طبلة الست حفلات غنائية في القاهرة +5
الحياة في كايرو
