The Definitive Guide to Living in the Capital , Cairo , Egypt

في فترات الصيام خلال شهر رمضان، وبسبب حرارة الجو الصعبة، بنعمل حاجات وعادات غذائية ساعة الفطار خاطئة جدًا، وده نتيجة العطش الشديد نتيجة حرارة الجو، أو الجوع نتيجة إننا ما اتسحرناش مثلًا، لكن العادات أو الحاجات دي بتسبب مشاكل صحية مختلفة لازم ناخد بالنا منها علشان مانقعش فيها.

أول عادة سيئة ومش صحية خالص هي شرب الماء بشكل مبالغ فيه، وده في الغالب يا بيبقى وقت السحور، علشان بنبقى خايفين نعطش طول اليوم، ،يا بيبقى ساعة الفطار.

شرب الماء كتير على السحور، بيتسبب في تشغيل الكلى بشكل فوق الطبيعي، وبالتالي ده هيتطلب منها أنها تتخلص من الماء الزيادة، وبالتالي هندخل الحمام كتير، وده معناه عطش خلال النهار.

علشان كده، يفضل إننا ناكل فاكهة غنية بالماء على السحور زي البطيخ، والشمام، والتفاح، أفضل من شرب الماء بشكل مباشر، وده لإن الفواكه دي بتفرز الماء تدريجياً في الجسم وانت صايم.

كمان بلاش نفطر على ماء ساقع فجأة، وده لإن شرب الماء مباشرة على الفطار بيقلل حركة الدم للمعدة والأمعاء، وده بينتج عنه مشاكل في الجهاز الهضمي زي المغص والتقلصات، علشان كده يفضل نشرب ماء درجة حرارته عادية بعد الإفطار، أو نشرب حليب بالتمر.

لو طالبه معاك ماء ساقع، فخليه بعد الفطار، بلاش وانت بتفطر حتى، لإن ده خطر على المعدة، وبيعمل صعوبة في الهضم، وسمنة، وحموضة متكررة بعد الفطار.

العادة اللي بعد كده هي أكل الحلويات بعد الفطار على طول، والعادة دي بتلعب دور مهم في تراكم الدهون في الجسم، والسمنة والكوليسترول، علشان كده لازم نستنى لفترة قبل ما ناكل الحلويات، ويا ريت تبقى قطعة صغيرة، وياريت لو كات مرة أو مرتين في الأسبوع.

موضوع تناول الفواكه ده موضوع مهم جداً، لإن الفاكهة مصدر ممتاز للفيتامينات والأملاح المعدنية اللي هيحتاجها جسمك خلال الصيام والنهار في رمضان، كمان ممكن جداً إن الفاكهة تساعد في محاربة السمنة وإنقاص الوزن، علشان كده مهم جداً إننا ناكل فواكهه في رمضان.

حاول تبعد وتهرب من الملح والتوابل، لإن أكل أي أطعمة مملحة أو مخللات هييساعد على زيادة تخلص الجسم من الماء، وده هيخليك تحس بالعطش وعدم انتظام ضربات القلب.