The Definitive Guide to Living in the Capital , Cairo , Egypt

رمضان شهر الخير، دي حقيقة ما فيش فيها جدال! لكنه كمان موسم تعب وإجهاد لبعض الناس، وعلشان كده فكرنا في كايرو 360 نقدم لكم شوية نصائح مهمة ممكن تساعدكم تأكلوا وتعيشوا بطريقة صحية طوال رمضان.

هتعرف في الموضوع ده، تاكل إيه، وما تاكش إيه، وإزاي تلعب رياضة بطريقة سليمة، وإيه الأضرار اللي ممكن يسببها لك التدخين.

تأكل إيه: لازم على قد ما تقدر تعمل توازن فى الإفطار والسحور، والأكل يشمل كل الأنواع؛ بروتينات، وكربوهيدرات، وألياف، وفيتامينات ومنتجات ألبان. طبعًا كلنا أول ما نشوف طبق كبير فيه أى أكل مع الأذان كلنا بننطلق، بس المشكلة أن حتى أسرع عملية هضم ممكنة مش هتقدر تستحمل المفاجأة فى ظروف الجوع والمعدة الفاضية؛ الأكل بكميات كبيرة، وبسرعة ممكن يسبب زيادة فى الوزن على مدار الشهر. قبل ما تبدأ أكل، اشرب مياه كثير علشان جسمك يرتوى، ويساعدك كمان تتجنب الإسراف فى الأكل.

أتعودنا أن الصيام بيتكسر بحاجة بسيطة؛ غالبًا تمر. طبق شوربة دافئ بيجهز معدتك للأكل وتبدأ عملية التمثيل الغذائى تشوف شغلها. بعضنا بيبدأ أكلته بمشروب دافئ أو حتى بكوباية خشاف، عصائر زى قمر الدين والكركديه مش بس بيعوضوا نقص السوائل ويزود جسمك باحتياجاته من السكر، دول كمان مليانين فيتامينات أساسية بتنقصنا طوال فترة الصيام.

الأكلات الغنية بالكربوهيدرات المعقدة والألياف بتُهضم تدريجيًا، بمعنى أن الطاقة الناتجة عن هضمهم بتخرج ببطء وتساعد على الإحساس بالشبع طوال اليوم، وبين الوجبات كمان. السحور لازم يكون خفيف، فيه أكل بطئ الهضم زى العيش الشامى، والأرز، والعدس أو الشوفان. الفواكة والحبوب كمان بتزود الجسم بكمية مناسبة من الألياف تساعد على الهضم المنتظم.

ما تأكلش إيه: فيه أكلات ممكن تضر الجسم وسط عملية الصيام ولازم نتجنبها؛ الكربوهيدرات سريعة الحرق زى العيش الأبيض أو المكرونة ممكن تسبب لك انتفاخ، وفى نفس الوقت قيمتها الغذائية قليلة. الأكلات المقلية برضه مش صحية، خصوصًا أن عملية التمثيل الغذائى بتكون صعبة طوال الشهر. جرب الطهى فى الفرن أو الشوى أو التشويح كبديل لعملية القلى، الاستمتاع بكميات من الأكل الدسم زى الكيكات والشوكولاتة برضه فكرة مش لطيفة، رغم أن مستويات السكر بتزيد سريعًا فى الأول، الطاقة المستفادة منه مش ممتدة طوال فترة الصيام.

المشروبات الغنية بالكافيين زى البيبسى، والشاى والقهوة من الممنوعات لأن الكافيين بيسرع من فقد المياه وبالتالى يحس الجسم بالجفاف. 

اتمرن: التمرين جزء مهم من روتين حياتك، لكن مش بينصح بالتمرين فى وقت الصيام؛ العرق معناه جفاف، وعرق كثير ممكن يبقى خطير، جوه وبره الجيم. بعد وجبة كبيرة فى الإفطار، احتمال تشعر بالخمول والكسل، وهنا بينصح الخبراء تأكل وجبة صغيرة، تتمرن، وبعدها وجبة كبيرة أول ما تخلص تمريناتك. تضخيم العضلات أو تقليل الوزن ممكن تحقق أى منهم فى رمضان، لو مشيت مضبوط. لو خلاص بقى مش قادر تمسك نفسك عن طبق المحشى، اتمشى بعد الإفطار.

قول مع السلامة للتدخين: التدخين ضار للصحة، نقطة ومن أول السطر. ليه ما يكونش الشهر الكريم هو انطلاقك للامتناع عن التدخين للأبد؟ بالنسبة للمدمن عليها، ما تفرقش يبطل إمتى، يبقى ليه ما تبدأش من النهارده؟ رمضان شهر لتهذيب النفس والتأمل وبيقدم لك كمان أحسن فرصة لطرد العادات السيئة، وعمومًا العزيمة والتصميم فى حد ذاتهم مكسب كبير.

بصراحة، صعب تبطل وكل اللى حوليك بيدخنوا، وعلشان كده لو بطلتوا سوا، بيبقى عندكم دافع أنكم تشجعوا وتحمسوا بعض. طبعًا بجانب النظافة الشخصية اللى بتكسبها لو بطلت تدخين: أسنان بيضاء، جلد مشدود ورائحتك مش زى طفاية السجائر، إلخ..، ده غير كمان مزايا صحية مالهاش عدد. فى وقت بسيط جسمك ورئتيك بيبدأوا يعالجوا نفسهم وبعد أسبوعين من الامتناع عن التدخين مستويات الطاقة عندك بتبدأ تزيد؛ خلينا نكون صرحاء، كلنا فى رمضان ماشيين أصلاً بالعافية، ومحتاجين كل ذرة طاقة ممكنة.

لو خايف من أعراض الامتناع، روح على أقرب صيدلية واطلب منهم المنتجات  البديلة للنيكوتين. الاشتياق للسجائر بيزيد بسبب عادات معينة؛ غيرهم كأنك بتغير عادات أكلك، وخليك فاكر أن الاشتياق بيستمر حوالى عشر دقائق، فاشغل نفسك فيهم لغاية ما يعدوا.

حظ سعيد ورمضان كريم!