دليلك للتخلص من الصداع في رمضان
الساعة البيولوجية السهر الشوكلاته الكافيين صداع ضغط الدم نسبة السكر في الدم
Omar Abd-elmaqsoud
من أكتر الشكاوى اللي بيعاني منها كتير مننا خلال شهر رمضان هي “الصداع” والإرهاق الشديد بعد أقل مجهود، وخصوصاً لو عدد ساعات الصيام طويلة، ودرجات الحرارة في الطالع، ويفضل السؤال اللي فارض نفسه دلوقتي هو إزاي نبعد عن صداع رمضان؟
الأول لازم نبقى عارفين إن الصداع يعتبر “عرض” مش “مرض” أو مشكلة صحية، يعني نقدر نقول كده بالبلدي إن الصداع “جرس إنذار” لحاجة غلط حصلت في جسمك زي مثلاً:
نقص نسبة “الجلوكوز” في الدم، اللي هوه أصلاً بيكون مصدر الأكسجين لخلايا المخ، وبالتالي بتبدأ نوبات “الصداع” علشان تنبهك إن “المخ” محتاج “جلوكوز” أو “أكسجين”.
كمان من أكبر وأهم مسببات الصداع عند ناس كتير “اللخبطة ” في عدد ساعات النوم وعاداته اللي اتعودت عليها في غير رمضان، وده اللي بيعملنا اضطرابات في ساعة أجسامنا “البيولوجية”، وبيسبب صداع.
تغيّر مواعيد وجبات الأكل وخصوصاً للناس اللي متعوده تفطر الصبح أول ما تصحى، أو تغيير نوعية الأكل نفسه، ممكن جداً تكون سبب مهم للصداع في رمضان.
كييفة “الشاي” و”القهوة” و”الكافيين” و”المشروبات الغازية” و”الشوكولاتة” بيكونوا أكتر ناس معرضة لشبح “الصداع” يومياً في رمضان، وده أكيد بسبب نقص نسبة الكافيين في الدم.
كمان نقص كمية “النيكوتين” في الدم عند المدخنين، بيعتبر سبب رئيسي للصداع.
أما مشكلة الصداع “بعد الفطار” فده بيكون نتيجة تناول كمية كبيرة من الأكل ساعة الفطار، وده بيتسبب في إن كميات كبيرة من الدم
بتروح للجهاز الهضمي علشان عملية الهضم، وبالتالي كمية الدم اللي رايحة لخلايا المخ بتقل، وده بيسبب صداع جامد.
طيب، السؤال دلوقتي، نعمل إيه علشان نتخلص من الصداع واحنا صيمين؟ بص يا سيدي:
حاول تأخر وجبة السحور على قد ما تقدر، وحاول دايمًا تكون الوجبة متوازنة من حيث المحتوى، وخصوصاً الألياف الغذائية زي الخضار أو الكربوهيدرات المعقدة زي الشوفان والبقوليات، وده لإنها هتخليك تحس بالشبع لمدة طويلة، وهتحافظ على معدل السكر بالدم.
نقص أو انخفاض نسبة السكر في الدم بيكون أوقات كتير سبب في الصداع، وده بييجي نتيجة تناول وجبة نسبة السكر فيها عالية قبل ماتبدء الصوم، وده غلط، لإن ده هيعمل ارتفاع سريع في مستويات السكر في الدم، وبعديه على طول انخفاض سريع، وده بيعمل صداع زي ما قولنا.
علشان كده، حاول تكون نسبة السكر منخفضة في وجبة السحور، واهتم بشكل أساسي بوجبة السحور.
حاول تظبط ساعتك البيولوجية بتظبيط عدد ساعات النوم، وبلاش السهر، خصوصًا في الصيف.
اشرب كميات مناسبة من السوائل والماء في الفترة ما بين المغرب والفجر.
لو شغلك في منطقة هتعرضك للشمس أو الحرارة، البس نظارة شمس، وكاب.
بلاش ضغط عصبي أو نفسي في رمضان، حاول تبعد عن مسببتهم على قد ما تقدر، علشان تتجنب الصداع.
كميات كفاية من فيتامين ب 12 ، هتساعدك في التخلص من نوبات الصداع في رمضان.
لو ليك نشاطات يومية بتعملها، اعملها في المعقول من غير ما ترهق نفسك بالنهار، وتجنب أي مجهود بدني مرهق.
وفي كمان أكلات ومشروبات بتمنع أو بتقلل شعور العطش خلال الصيام، واللي بيكون أحد أسباب الصداع:
اشرب المشروبات الشعبية المعروفة زي الخروب والتمر هندى والشاي الأخضر، والأعشاب زي النعناع والينسون والكمون، والليمون بالنعناع الطازة، لإن كلها بتمنع العطش في الحر الشديد، وكمان مش شرط إن يكون عليها سكر، ممكن تستبدل السكر الصناعي ببدائل السكر الطبيعية علشان تقلل السعرات الحرارية .
كل خضروات كتير، لإن فيها كميات كبيرة من الماء، وهتخليك ماتحسش بالحر والعطش.
تناول كباية “زبادي” أو “لبن رايب” على الفطار والسحور هيساعدك على الهضم، وهيدي جسمك الماء اللي هيحتاجها،
“البطيخ” سواء أكل أو شربه عصير ممتازً جداً لتجنب العطش خلال نهار رمضان، لإن نسبة الماء فيه بتوصل لـ 93 %.
كمان من الخضروات اللي فيها ماء كتير، “الكرفس” وفيه حوالي 95% أليافه ماء، كمان بيساعد في خفض ضغط الدم.
الطماطم واحدة من الخضروات المرطبة للجسم بشكل جميل، وكمان بتساعد على بقاء الجسم محتفظ بالماء، علشان كده بإضافتها لطبق السلطة في الفطار، أو شرب كوباية عصير طماطم في السحور.
الخيار فيه نسبة عالية من الماء بتوصل لـ 96.7 % علشان كده هوه مهم جداً على السحور لتجنب العطش.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
