حافظ على لياقتك في القاهرة: 10 تمارين لازم تعرفها
Hend Salah
ممارسة الرياضة على عكس الكلام الشائع مش لازم تكون روتين متعب وممل حتى في القاهرة، مشكلة ناس كثيرة مع التمرين المستمر هي الالتزام والاستمرارية، بس لما ندخّل في التمرين حاجة مسلية، الموضوع هـ يتحول لعادة جميلة.
فيه عائق ثاني وهو أن ناس كثيرة بـ تفتكر أن التمرينات الجديدة وغير التقليدية مش فعالة زي التمارين المعروفة، وده طبعًا أي كلام والتمارين العشرة التالية بـ تؤكد كلامنا.
1- Pole Dancing
تمرين Pole Dancing بـ يجمع بين تمارين الكارديو والقوة في نفس الوقت، وأهميته بجانب تقوية الجزء العلوي من الجسم أنه بـ يساعد المبتدئين يحرقوا ما بين 250: 400 سعر حراري في 60 دقيقة، وكمان بـ يزيد من مرونة الجسم من خلال حركاته المختلفة، تقدر تحضر حصة Pole Dancing في بول فيت ستوديو Pole Fit Studio، وواضح طبعًا أنه للسيدات فقط.
2- Piloxing
الموضوع للوهلة الأولى شكله افتكاسة، بس أنك تجمع بين الملاكمة والبيلاتس والرقص يبقى كده حققت باقة تمارين متكاملة تحرق بها كمية سعرات محترمة، وكمان هـ تساعدك على بناء العضلات وزيادة لياقتك البدنية، حصص Piloxing موجودة في باور هاوس جيم، جولدز جيم وفايت & فيتنس جيم فاكتوري.
3- Cheerobics
التشجيع بـ يخلينا نحرق دهون؟ عارفين هـ تقول إيه، بس خلينا نقول لك أن Cheerobics أكثر من مجرد دروس رقص، الموضوع بـ يجمع الكارديو مع الأيروبكس ومعاهم تكنيكات رقص معينة، وهو يعتبر نوع من التمارين اللي بـ تركز على اللياقة البدنية اللي اتعملت علشان تساعدك على حرق الدهون وتزود قوة عضلاتك، تقدر تحضر حصص Cheerobics في تشيروبكس مصر Cheerobics Egypt أو في فلاي فيت فيتنس سنتر Fly Fit Fitness Center.
4- تمارين القفز
واضح أن فكرة التنطيط علشان تنزل وزنك هي أجدد موضة في القاهرة، لأن التمرين المعتمد على الترامبولين بـ يوفر تمرينة متكاملة على إيقاع الموسيقى الراقصة، شعبية تمارين القفز أو Jumping fitness بـ تزيد في القاهرة وتقدر تحرق معاها 800 كالوري بحالهم في ساعة واحدة، حاول تجرب تمرينة Jumping fitness في جولدز جيم أو في بي فيت BeFit Egypt.
5- Jazzercise
من أشهر التمارين على قائمتنا هي Jazzercise اللي بـ تجمع بين الرقص والبيلاتس والملاكمة وكمان اليوجا في واحدة من أجمل وأقوى التمارين الرياضية، ممكن تلاقي Jazzercise في تيتانز جيم أو جولدز جيم ودلوقت أصبح من أشهر التمارين الموجودة في معظم جيمات القاهرة.
6- اليوجا الهوائية
اليوجا الهوائية أو اليوجا المضادة للجاذبية بـ تجمع بين أوضاع اليوجا التقليدية مع مجموعة من تمارين الرقص والبيلاتس، كل الكلام اللي فات جميل جدًا، بس الكلام الجاي هو اللي فيه المفيد؛ كل الحركات هـ نعملها وإحنا في وضعية اليوجا، اليوجا الهوائية هي نوع من الحركة المتكاملة بـ تساعدك تستخدم كل عضلاتك وكمان تخليك تجرب إحساس الطيران نوعًا ما، دروس اليوجا الهوائية موجودة في أون ذا مات ستوديو On the Mat Studio.
7– الملاكمة
سيبك من أنها رياضة عنيفة، بس الملاكمة هي تمرين متكامل لجسمك بـ يساعدك تحرق ما بين 10: 15 سعر حراري في الدقيقة وكمان بـ يساعد على تناسق جسمك، وهي دي فائدة اللكم والركل، دروس الملاكمة متوفرة في فايت كلوب Fight Club وفيت بوكس Fitbox وبودي شيبرز إيجيبت Body Shapers Egypt.
8– تمرين Brazilian Hip
تمرينة قوية لعضلة المقعدة والورك وهي Brazilian Hip اللي بـ تساعدك أنك تعمل فورمة قوية وشكلها جميل، تمرين Brazilian Hip يشمل تمرين الحركة على الحائط wall-sit وglute-bridge وSquat بوزن الجسم، والتمارين دي كفيلة أنها تغير تمامًا من شكل نصفك السفلي، تمرين Brazilian Hip موجود في بودي شيبرز إيجيبت BodyShapers Egypt.
9– سالسا وزومبا
بقى من الطبيعي نشوف الرقص كنوع من تمارين اللياقة، على مدار السنين شوفنا ناس بـ تبعد عن تمارين الجيم القوية وتهرب لدروس الرقص اللاتينية زي السالسا والرومبا والسامبا أو ينضموا لموجة الزومبا المنتشرة حاليًا، تمارين السالسا والزومبا بـ يجمعوا بين تمارين الأيروبكس القوية مع حركات الرقص اللاتينية والهندية.
من فوائد التمارين الممتعة دي هي زيادة اللياقة وتغيير شكل الجسم وتقوية العضلات، حضور تمارين السالسا والزومبا في جيمات للسيدات فقط ومنها هيرز Hers وفيت ماي وايFit My Way أو ممكن تتابعوا صفحة Zumba Instructors in Egypt لمعرفة أماكن ومواعيد الحصص التدريبية.
10. Yogalates
Yogalates والمعروفة كمان باسم هاثا يوجا، بـ تجمع بين عدد من أوضاع اليوجا مع تمرينات قوية، النوع ده من التمارين بـ يساعد على تغيير شكل الجسم والتخسيس، وفي نفس الوقت بـ يحافظ على تجربة اليوجا الممتعة اللي تعتبر مطهر طبيعي للجسم، دروس Yogalates موجودة في فيت ماي واي Fit My Way.
مقترح
معالم وسياحة
برج القاهرة.. زهرة اللوتس اللي قالت "لا"
البرج برج القاهرة +4
الحياة في كايرو
