مأنتخ على كنبتك وبتضرب واحدة تشيلي تشيز فرايز وبتحلف إنك هتبدأ الدايت من بكره الصبح وكل مرة ترجع تاني للأكل الغير صحي؟ الحل عند “بي فيت”، وده مركز للياقة البدنية فتحه المدرب المعروف على مظهر وله فروع في كل مصر، وكمان وصلوا الساحل لما فتحوا الصيف اللي فات في هاسيندا باي.
فرع المعادي موجود داخل خيمة كبيرة في ملعب أكاديمية النصر القريب من ميدان فيكتوريا وعلى بعد دقايق مشي من فوليوم وان للأدوات المكتبية. بي فيت المعادي عندهم ثلاث درجات للتمرين، تمرين المبتدئين “Foundations” وده بيكون حصة مدتها 60 دقيقة تشبه الكروس فيت بس شدتها أقل، وفيها بتتمرن بأوزان خفيفة أو من غير أوزان خالص وتزود بالتدريج لغاية ما تقدر تشيل أوزان تقيلة.
طيب، دلوقتي لازم تعرف أول اكتشاف هتكتشفه في بي فيت: جسمك ما ينفعش يا عبود! تاني اكتشاف: دروس Foundations هنا مختلفة عن أي حصص مبتدئين في أي مكان تاني. ثالث اكتشاف: المدربين الجمال اللطاف اللي أنت شايفهم دول مش هيرحموك وأنت واقع وكلك عرق ومش قادر تقوم وبتطلب منهم الرحمة بعد أول 25 دقيقة.
الموضوع في المجمل يستحق التعب، وهتلمس الفرق اللي هيحصلك بعد الاتزام بالتمارين القوية.
الحصص ومدتها 60 دقيقة معظمها بيكون بنفس الترتيب: تبدأ تجري كام دقيقة في الخيمة، وبعدين ثلاثة مجموعات تسخين بتمارين ضغط وبطن وسكوات. بعدها هتدخل على ثلاثة أو أربعة مجموعات تشمل تمارين بالأثقال معظمها سكوات وتمارين لياقة. معظم التمارين بتركز على زيادة قوة الجسم عن طريق التركيز على تمارين الضغط ورفع الأثقال وغيرها.
لما يكونوا عايزين يشدوا عليك هيخلوك تخلص تمرينتك بست دقائق جري متقطع أو تمرين تاباتا، وده عبارة عن تمرين ثبات لمدة 30-40 ثانية وبعدين 10 ثواني راحة. لو قدرت تقف على رجليك بعد كل ده، هتنهى التمرين بشوية إطالات.
لو التزمت بحصص بي فيت وروحت كام مرة في الأسبوع، هتقدر بعد كام أسبوع تلعب شوية تمارين ضغط، ومن الحاجات الحلوة كمان إن الحصص شغالة الصبح وبالليل لمدة ستة أيام في الأسبوع ومنهم حصة الساعة 11 الصبح يوم السبت، وبكده مفيش عذر يمنعك تروح تتمرن.
سعر الحصة الواحدة 100 جنيه، أو ممكن تدفع 850 جنيه وتشترك في 10 حصص، وعندهم اشتراكات 30 حصة كمان. أما لو مش عايز تتمرن مع ناس كتير ومحتاج مدرب خاص، ممكن تشترك في عشر حصص بسعر 2500 جنيه.
من الأخبار الحلوة كمان إن جورميه إيجبت فاتح قريب من بي فيت، وبكده تقدر تكافئ نفسك بآيس كريم وكوكيز حلوين بعد تمرينة قوية. بتقول إيه؟ الكلام ده مش صحي؟ كلنا محتاجين نشجع نفسنا عشان نكمل المشوار.
أكتب تقييم
مقترح
مطاعم
3 أماكن في القاهرة بتعمل أحلى شاورما لبناني
احلى شاورما لبناني في القاهرة شاورما +3
معالم وسياحة
