The Definitive Guide to Living in the Capital , Cairo , Egypt

فوائد اليوجا تشمل مجموعة عوامل مهمة جسديًا، ونفسيًا وصحيًا، والكلام ده بالنسبة للبالغين، طب إيه فائدتها بالنسبة للأطفال؟ معظم الأمهات بـ يحاولوا يوصلوا لبيت سعيد وصحى، وطريقة تحقيق التوازن ممكن يكون صعب شويتين.

لكل الأمهات واللى منتظرين أطفال قريب، “فلو – FLOW” مركز العناية بصحة الأمهات والأطفال لسه فاتح فى هليوبوليس، وبـ يرحب بكل السيدات وسط جو من الراحة والهدوء. المكان من تأسيس ثلاث أمهات ناجحين: ياسمين الحلو، مريم كامل ورانيا المصرى، والمجموعة الملهمة دى كلهم حاصلين على رخصة تدريس تدليك الأطفال، واليوجا للأمهات والأطفال، وقرروا يخلقوا جو مريح للأمهات والأطفال لممارسة أنشطة صحية.

“بيبى يوجا” بـ يوفر للأمهات والأطفال ساعة يوميًا وسط أجواء خالية من الهموم، بحيث يقدروا يتفاعلوا ويسترخوا.

تحت إشراف مدرسين معتمدين، بيبى يوجا بـ يشجع الأمهات على فهم أهمية تقضية وقت مع ملائكتهم الصغيرين، عن طريق ممارسة نشاط إيجابى مع بعضهم، ومساعدتهم على تطوير رابط مع أطفالهم، مع تنمية صحتهم. الأمهات يقدروا ينشطوا ويدلكوا أطفالهم عن طريق تنفيذ حركات اليوجا التقليدية اللى بـ تطور من قدرات الطفل الجسدية، والعقلية والنفسية. وكمان بيبى يوجا تحولت لجانب مفيد للأمهات وأطفالهم، عن طريق زيادة قوة التحمل، والمرونة والتناسق، مع ضبط شكل نومهم، بحيث جهاز مناعتهم يشتغل ويساعد على تقليل الأمراض.

المركز بـ يقدم دروس مختلفة، منها مساج ويوجا للطفل، حصص يوجا للأسرة والسيدات، مواعيدهم من الأحد للخميس بداية من 8 الصبح لغاية 2 الظهر فى فلو هليوبوليس، وكمان حصص ثانية فى مركز نن فى الزمالك ومجمع قطامية هايتس.

علشان حصص المساج واليوجا بـ تختلف على حسب المرحلة العمرية، مساج الأطفال الرضع للأمهات والأطفال بـ يكون بين سن 4 أسابيع لغاية 6 شهور؛ الأمهات بـ يعملوا مساج خفيف لأطفالهم ويحركوهم بحركة متناغمة وهم شايلينهم، مع التدرب على طرق الاستشفاء الخاصة بمرحلة بعد الولادة وطرق تسليتهم. هدف الدرس هو تقديم وقت إيجابى مثمر بين الأمهات وأطفالهم.

مع مرحلتين من البيبى يوجا: “بيبى يوجا 1” مصمم علشان الأعمار بين 3: 12 شهور، وفيه الأطفال بـ يعملوا تمارين إطالة اليوجا التقليدية بحركات على بطن، وظهر وذراعات أمهاتهم وسط موسيقى إيقاعية لإضافة جو ممتع. فى “بيبى يوجا 2” الأطفال بين 12 و18 شهر يقدروا يتحركوا من غير أى مساعدة. الدروس دى بـ تجمع بين الأنشطة الترفيهية، والتواصل مع أمهاتهم والحركة بحرية، وفى آخر الحصة بـ يكون وقت الاسترخاء بين الأم والطفل.

بالنسبة للأعمار بين 18 شهر و4 سنين، المركز بـ يقدم “يوجا لمرحلة تعلم المشى”، عبارة عن برنامج تمارين متقدم أكثر اسمه “سمارت”، وفيه الأمهات والأطفال بـ يشتركوا فى تمارين إطالة، وحركة واسترخاء مع بعض، كل ده بـ يتم بشكل حماسى يساعد على تنشيط وعى الطفل، ومساعدته على تطوير مهارات الكلام والسمع.

فى يوجا الأسرة، “فلو” بـ يقدم مجموعة متنوعة من الحصص المبتكرة منها “فيت تودز” للأعمار بين 3: 5 سنين، “موسيقى وحركة” من 6 شهور لغاية 3 سنين، “آرت” من 18 شعر لغابة 4 سنين، و”ستورى تايم” لكل الأعمار. الحصص دى بـ تحاول تكتشف أنشطة جديدة تطور من حواس الأطفال التخيلية والتعبيرية.

وعلشان فلو بـ يشجع كل السيدات أنهم يكونوا فى أحسن صورة، وكمان تحسين صحتهم، المركز بـ يقدم “يوجا للسيدات” بـ يتكون من ثلاث مراحل يختلفوا على حسب الهدف المطلوب. “يوجا قبل الولادة” بـ تساعد الحوامل على المحافظة على قوامهم وتقوية عضلاتهم استعدادًا للولادة. النوع الثانى “يوجا بعد الولادة” بـ يركز على الاستشفاء بالنسبة للأمهات الجدد عن طريق تقوية عضلات البطن، والحوض والظهر، وفى نفس الوقت تخفيف الإجهاد عن الرقبة، والأكتاف ومنطقة الظهر العلوية. آخر حاجة “باور يوجا” مخصصة لكل السيدات اللى عاوزين يستمتعوا بحركات اليوجا المعروفة، وتجديد طاقتهم وسط جو مريح بعيد عن الدوشة.

كون اليوجا طريقة محبوبة لخلق تناغم بين العقل والجسم، لازم نعترف أن “فلو” يستحق التحية على تطبيقها وتقديم أشكال مفيدة من التمارين للأمهات وأطفالهم. صحيح فيه أوقات الأمهات بـ يحتاجوا مساحة خاصة بهم، معظم الناس هـ توافقنا لما نقول أن تقضية ساعة مفيدة مع أطفالنا بـ تخلق رابطة تستمر طوال العمر.

لو عاوز تعرف أكثر عن “فلو” وبرامج اليوجا ادخل هنا.