بعد انطلاقها رسميًا.. 5 معلومات عن بطولة مصر الدولية لتنس الطاولة
بطولة مصر الدولية لتنس الطاولة فعاليات رياضية في القاهرة منتخب تنس الطاولة منتخب مصر لتنس الطاولة
Mohamed Talaat
في كايرو 360 بنهتم بالأفلام والمطاعم والكتب والتسوق، وبنهتم كمان بكل ما يتعلق بالصحة واللياقة. وفي واقع بيهتم بدرجة كبيرة بكرة القدم بس، بنشجعكم تتابعوا رياضات مهمة تانية علشان أبطالها يستحقوا تشجيعكم، علشان كده قررنا نكلمكم عن حدث مهم هيحصل على أرض القاهرة، وهو بطولة مصر الدولية لتنس الطاولة اللي هتنطلق رسميًا النهارده الاثنين 24 أكتوبر 2022 باستاد القاهرة.
تعالوا نتعرف أكتر على البطولة دي من خلال 5 معلومات فيهم الخلاصة.
1 – بطولة مصر الدولية لتنس الطاولة اللي هتقام على أرض ستاد القاهرة هتبدأ النهارده بمنافسات الإناث واللي هتستمر لحد يوم 26 أكتوبر الجاري، وبعدها هتقام منافسات الذكور بداية من يوم 28 أكتوبر ولحد اليوم الأخير للبطولة.
2 – بيشارك في البطولة المراحل السنية تحت 11 سنة، و13 سنة، و15 و17 و19 سنة.
3 – هيشارك من مصر 109 لاعب بالإضافة إلى 114 لاعبة في مختلف الفئات العمرية المشاركة.
4 – البطولة بيشارك فيها 22 دولة بإجمالي 358 لاعب ولاعبة، وبتقام فعاليات البطولة على أرض صالة رقم 2 بمجمع الصالات باستاد القاهرة الدولي.
5 – الاتحاد المصري لتنس الطاولة، أعلن إنه نسق مع أجهزة الدولة المختلفة لخروج البطولة بأفضل صورة، ومن ضمنها تجهيز كل الأمور المتعلقة باستضافة الوفود القادمة إلى مصر من مختلف أنحاء العالم واللي بتضم مسؤولين من الاتحاد الدولي والاتحادات الإفريقية.
