بعد ارتفاع أسعار السجائر.. 5 طرق علمية علشان تبطلها
أضرار التدخين التدخين السلبي رياضة نصائح للتوقف عن التدخين
Omar Abd-elmaqsoud
لو مش فارق معاك صحتك أو صحة اللي حواليك اللي بتضيع بسبب التدخين، سواء الإيجابي أو السلبي، فعلى الأقل هيفرق معاك ارتفاع أسعار السجاير مؤخرًا في الأسواق المصرية، واللي أكيد هيأثر على جيبك، ودي فرصة هايلة لإنك تاخد قرار وقف التدخين فورًا، أهو منه صحة ومنه توفير كمان.
لو قرأت السطرين اللي فوق دول وأثروا فيك أو كنت مهتم فعلًا إنك تبطل تدخين، هتكمل معانا السطور الجاية علشان نقولك على شوية أسباب هتساعدك بجد على تبطيل السجاير، نشرها موقع “راديو سوا” الأمريكي، نقلًا عن مجموعة من أبرز الوكالات والجمعيات الصحية الأمريكية.. تعالى نقولك عليها:
اسأل نفسك، عايز تبطل ولا لأ؟ وليه؟:
ده أكبر حافز هيساعدك في مقاومة إغراءات التدخين، لإنه ببساطة جاي من جواك، أنت اللي قررت، وأنت اللي عارف ليه هتبطل، من غير أي مؤثر خارجي، علشان كده مهم تحط قائمة بأسباب قرارك تبطيل السجاير.. وابعد عن الأسباب الكلاشيه زي “لأنه مضر بالصحة” وخليها مثلًا “عايز أحمي عيلتي من التدخين السلبي” أو “عايز أكون قدوة كويسة لأولادي” أو”عايز أوفر فلوس”.. وخلي بالك إن في 30 سبب للإقلاع عن التدخين مالهومش علاقة بصحتك.
مهم كمان تحط خطة للتعامل مع أعراض تبطيل التدخين، واللي منها الاكتئاب والتوتر وصعوبات النوم وسرعة الغضب وصعوبات التركيز وزيادة الوزن.
اطلب المساعدة:
مش عيب على فكرة، روح وقول لعيلتك وأصحابك اللي بتثق فيهم إنك نويت الإقلاع عن التدخين، واطلب منهم يدعموك في الأيام والأسابيع الأولى، لكن مهم تحدد لهم يدعموك إزاي، ودي بتختلف من شخص للتاني.
وطبعًا مهم تتخلص من أي منتجات ليها علاقة بالتدخين حواليك، سواء في الشغل أو في العربية أو في البيت، زي التبغ أو الولاعة أو الكبريت أو طفايات السجاير، وحاول تتخلص من روائح الدخان في الأماكن اللي بتبقى موجود فيها باستمرار، لإن ريحة الدخان هتستفزك.
تليفونك ممكن يساعدك:
في تطبيقات وحلول إلكترونية كتير هتساعدك على الإقلاع عن التدخين، فهتلاقي تطبيقات بتقدم نصايح ومعلومات وعبارات تشجيع وتحليلات تفاعلية لوضعك كمدخن، وهتوفر لك فرصة تتكلم مع ناس في نفس مرحلتك بيحاولوا يبطلوا، وهتتبادل الخبرات معهم.
من التطبيقات المجانية المتوفرة لأجهزة “آندرويد” ومدعومة باللغة العربية كمان، تطبيقات “أضرار التدخين ملف شامل” و”نصائح لترك التدخين”، و”التدخين وأضراره”.
ومن التطبيقات المجانية الممتازة بالإنجليزي لأجهزة “آبل”:
Quit Smoking لأجهزة آندرويد.
Quit START المتوفر لأجهزة آبل وآندرويد.
ممكن كمان تقرأ مدونات لناس بطلوا تدخين، أو تتابع حسابات على تويتر وفيسبوك بتبعت معلومات يومية عن أضرار التدخين ونصائح وعبارات تحفيزية منها حساب “صفاء لمكافحة التدخين” وحياة لمكافحة التدخين، وعلى فيسبوك حساب “حياة بلا تدخين” و”لا للتدخين” و”كيف تتوقف عن التدخين بسهولة” و”شباب بلا تدخين”.
أو تتفرج على فيديوهات عن أضرار التدخين وطرق الإقلاع عنه.
ابدأ برنامج رياضي:
الرياضة بتلعب دور مهم جدًا في تقليل شهيتك للسجاير للثلث تقريبًا، ودي دراسة علمية اتعملت في جامعة “إكسيتر” في بريطانيا.
الدراسة قالت إن المدخنين اللي بيمارسوا الرياضة، فرص نجاحهم في الإقلاع عن التدخين بتوصل لـ 55% مقارنةً باللي مش بيمارسوا رياضة، وكمان هتقل فرص رجوعهم للتدخين بنسبة 43%.
ده غير إن الرياضة هتساعدك تخس، أو بمعنى أدق، هتساعدك في تجنب زيادة الوزن اللي تعتبر واحدة من أبرز أعراض الإقلاع عن التدخين، وكمان هتساعدك في تعديل مزاجك، وتحسين نومك.
هتوقف فجأة أو تدريجي دي حاجة ترجع لك:
المعهد القومي للسرطان أكد إن التوقف المفاجئ عن التدخين أسلوب ناجح بالنسبة لبعض المدخنين، لكن مش شرط يكون ناجح عند الكل، لإن فيه مدخنين الخطوات التدريجية بتكون أفضل بالنسبة لهم، وعلشان تعرف إيه المناسب ليك، راجع دكاترة متخصصين أو دكاترة نفسيين.
وعلى العموم في دراسة بريطانية أكدت إن اللي بيتوقفوا عن التدخين بشكل مفاجئ أو بشكل تدريجي الاتنين نتايجهم واحدة.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
