The Definitive Guide to Living in the Capital , Cairo , Egypt

النهارده، الخميس 14 أكتوبر، نجحت الأجهزة الأمنية بالقاهرة، في إنقاذ شاب حاول الانتحار بإلقاء نفسه من فوق سطح عمارة بالمساكن الشعبية فى حلوان، لمروره بأزمة نفسية.

وتكرار حوادث الانتحار في السنوات الأخيرة، محتاج مننا نتعامل مع الطب النفسي بشكل مختلف، بشكله السليم، مش عيب خالص تروح لطبيب نفسي لو حسينا بمشكلة نفسية، ومش عيب نقول للمقربين مننا إننا بنمر بمشاكل نفسية.

في الموضوع ده هنعرفكم على 3 أماكن في القاهرة للعلاج من الأمراض النفسية بأسعار رمزية.

العباسية

أكبر مستشفى للأمراض النفسية في مصر، وهي مستشفى متكاملة، فيها أقسام للعلاج الاقتصادي واستثماري، وفيها أقسام نفسية وعصبية وعلاج إدمان مخدرات وإقلاع عن التدخين وصحة طفل وصحة مرأة، وغيرها من التخصصات اللي بتعتمد بشكل أساسي على العامل النفسي، والكشف في المستشفى علشان تشخيص الحالة بـ1 جنيه بس، والمواعيد بتاعتهم من 9 صباحًا حتى 12 ظهرًا يوميًا.

الدكتور رضا الغمراوي مدير مستشفى العباسية للصحة النفسية قال في تصريح خاص لكايرو 360 أن الكشف في المستشفى أفضل من الأطباء وبيكون من قبل متخصصين مدربين على أعلى مستوى وفي سرية تامة وبدون أي واسطة، وأكد إن المريض هيكشف ويصرف الدواء بجنيه بس، وكمان عندهم قسم اقتصادي للحجز في المستشفى بيكون  “فندقي” بأقصى حد 2000 جنيه في الشهر.

العنوان: 1 شارع صلاح سالم – العباسية.

الدمرداش

مستشفى الدمرداش فيها مركز متخصص للطب النفسي أسسه الدكتور أحمد عكاشة، الطبيب النفسي المعروف، وده الكشف فيه أغلى من العباسية شوية وسعره 5 جنيه، ولكن فيه خدمة غريبة قوي بيقدموها، وهي انك بتاخد “بون” مع تذكرة الكشف علشان تشرب بيه 2 شاي مجانًا في الإستراحة الخاصة بالمركز لحد ما ييجي دورك، وكمان بيصرفوا علاج مجاني وعندهم غرف حجز وتأهيل للحالات، ولكل مريض كارت متابعة بيستمر معاه طوال رحلة العلاج، وهما مواعيدهم من الأحد للأربعاء من 9 صباحًا حتى 2 مساءً وباقي الأيام شغالين 24 ساعة.

العنوان: شارع رمسيس بجوار مسجد النور بالعباسية.

مصر الجديدة

مستشفى مصر الجديدة للصحة النفسية شهرتها مستشفى “المطار”، فيها قسم لإزالة السموم “الإدمان” وتأهيل المتعافين من الإدمان مجانًا، وكمان فيها علاج بسعر رمزي في العيادات الخارجية للصحة النفسية، وفيه كمان احتجاز لو الحالة احتاجت ده، سواء مجانًا أو بأسعار خاصة للقسم الإقتصادي، ومواعيدهم يوميًا من 9 صباحًا حتى 1:30 ظهرًا، طوال أيام الأسبوع ماعدا الجمعة.

العنوان: طريق المطار – بجوار المجمع الإدارى لمصر الطيران.

وأخيرًا..

ماتنسوش أن الأمانة العامة للصحة النفسية مخصصة خط ساخن علشان يستقبل استفسارتكم على رقم 0220816831 في أي وقت من 9 صباحًا حتى 3 عصرًا يوميًا، وهيرد عليكم متخصصين نفسيين تتكلموا معاهم ويرشدوكم في حالة انكم محتاجين تزوروا طبيب نفسي.